Dimapur Naga Students’ Union-i pelaba lemsatep

Dimapur, Monupii/May 15 (TYO): Pei ki/district bushia moteti Dimapur nung anendaka aliba kaketshir aser nüburtem meyipa yokba maparen nung Constituent Tribal Units, kaketshir telok balala, arogotem, kija aser lokti tentet kwikati yaritepogo, nenok ajanga dang Dimapur Naga Students’ Union (DNSU) ajanga pelaba lemsateper, ta sangdong ka ajanga ashi.
Jenjang talangba nung All Nagaland Private Bus Association ajanga par service agütsüba aser anendaka alirtem nem angadi bus tem tenlaba atema Arogotem aser kaket rejutem danga kanga pelar, ta sangdong ajanga ashi.
Lockdown tezüker anogo 34 dak tali Union ajanga hostel aser taa agütsür aliba ki nung anendaka alirtem nem teyari agüja aru. Anogoshi aser tang tashi iba ama mapa inyakba mapang Dimapur nung kaketshir 3000 shi nem nüngdakba jang-o-tzü aser chiyongtsütem District Administration teyari ajanga agütsüogo.
Item kaketshirtemi anogoshi timtem balala ajangshibatem lemsatepa agi onok tenük lapok. Karibo anogo ka nung khen dang chiyongba tensa tia lemsatepogo aser temolung nung kongshi.
Dimapur yimti tulu asünung ki ka nungi ki kati oa iba mapa inyaktsü ya kanga tasak ta onoki meteter liasü, saka onoki tajungtiba nung yaritepogo ta amanger, ta DNSU ajanga ashi.
Onok taküm lendongbang nung yutsür ta metetaka onok kodanga tezü danga meliasü, saka kaketshirtem asoshi tentetba lokti ka asünung aser kaketshir lenir ka ama nokdaka alinung, onoki timtem nung aliba kaketshirtem mezüng südaktsü, ta sangdong ajanga ashi.
Dimapur Naga Students’ Union-i maneni kaketshirtem aser nüburtem tenzüktsü aser anendaka aliba kakeshirtemi jang-o-tzü nung timtem ajuruba lira yariteptsü renema lir.
District administration aser police den yaritepa DNSU-i Supermarket nung anepdang 4:00 ako nungi lapokba wholesale market nung achayanga arudagi.
Kaketshirtem nem teyari balala agütsüba maparen nung yaritepba asoshi Ato Kilonser Kitovi N Zhimomi aser par kibong, Minister, Higher & Technical Education, Tribal Affairs, Temjen Imna Along, Dr. Roland Lotha, Commissioner of Police, Dimapur, Rothihu Tetseo, Muslim Council Dimapur aser pei sasa molungsoa yariteper ajak dang kangasa pelaba lemsateper, ta DNSU sangdong ajangasa ashi.