Dimapur New Market nung Y. Patton-i CCTV camera lapoktsü

Bodbarnü New Market, Dimapur nung Home minister, Y. Patton-i CCTV lapoktsüba sentong nung o jembiba angur.

Dimapur, March 30 (TYO) : Dimapur nung tongtipang shishilembadak New Market nung Closed Circuit Television (CCTV) cameras enokogo aser iba Nagaland nung shishilembadak CCTV enokbaji iba ya mezüng asütsü.
Iba mapa ya New Market Business Owners Association (NMBOA)-i ketdangsüa inyak aser Dimapur Chamber of Commerce & Industries (DCCI)-ia teyari agütsü.
New Market telongtet nung CCTV camera 23 enokogo aser item ajanga ashiauer aser rakzükraktemer nungi kümzüka ayutsü.
Bodbarnü Home minister, Y Patton-i CCTV camera lapokba sentong nung tongti tesemdanger ama shilem agia jembidang ashiba agi, CCTV camera enokba jagi meperir saka itemji amshitsü atema police nübo nüngdaker.
Sorkar nem New Market nung police station ka lapoktsü tesem agütsüra, lapoktsü mulunga lir, ta Y. Patton-i ashi.
Dimapur kübok tesem balala nung CCTV 60 enoktsü atema Commissioner of Police Dimapur ajanga department dang asüngdang. Ibaji taküm küm tsüngda mapa küma inyaktsü aser Hazi market o Hongkong market nunga CCTV enoktsü, ta Home Minister-isa metetdaktsü.
Pai Home Minister ka ama inyakdang Dimapur nung law & order tajungba kümdaktsütsü atema inyaktsü, kechiyong Dimapur nung tensa jungra Nagaland tensa ajungtsü, ta paisa shisem.
Dimapur ya NE telungpurtem atema tejennokdak ka kümogo aser parnoki ozüng alema mapa inyaker. anungji GBs-i pei colony nung arua alirtem kanga jangja metettsüla, ta Y Patton-isa ayongzük.
Tanü sentong nung Commissioner of Police, Dimapur, Liremo Lotha-ia shishilembar telok dang kanga pelaba metetdaktsü.
CCTV ji shishilembartem atema dang masü saka public atema tajangzük lir aser iba ya ajanga police-i ozüng alema inyakertem aputsü atema teyari angur, ta Liremo Lotha-isa ashi.
Sentong nung NMBOA tir, Hokivi Chishi-i CCTV camera enokba odnag tatsü agi metetdaktsü aser Ahidur Rehman-i anküp tepela o jembi. Tanü agiba sentong nung ACAUT, Naga Council, Dimapur, Naga Women Hoho Dimapur, GBs Union, Dimapur Sadar, DUCCF aser DNSU nungi lennirtem aden.