Dimapur Night Carnival 2018 tenzükogo

Dimapur, Luchii/December 12 (TYO): Dimapur Night Carnival 2018 edition 6buba sentong ya Luchii/December 12, 2018 Rasemnü/Wednesday, tongti tesemdanger Minister for Health & Family Welfare, Pangnyu Phom-i lapoktsüogo.
Night Carnival sentong nung Minister for Health & Family Welfare, Pangnyuh Phom-i o jembidang, Nagaland nung Dimapur ya shishilembaba tesem tongtibang ka den tanüdangtsü ka ama lir, ta shia, pai, iba ama yimti tuluka nung alitsü maongka anguba ya sensopurtem atema temoatsü lir, ta metetdaktsü.
Pangnyuh-isa, North East nung shishilembaba tesemtem tajung rongnung Dimapur densemba ya temoatsü ka ama züngshia, nüburtemi Naga nunger aser tanga state tem atema tatishitsü tajung aser ajemaluba yimyatem sautsüla.
Local entrepreneurs aser zünger alir mapa mangur lanurtem pei dak aketba sempet tajung aser pei yanglutetba product tem sayatsü atema iba night carnival sentong ya maongka tajung ka asütsü. Iba denji külemi, artiste tasentem pei career nung maneni takok nguyonga aotsü aser pei mangdang jenjang tem lepshia bilemtettsü asoshi iba carnival ajanga sabang ka agütsür, ta Pangnyuh-i ashi.
Deputy commissioner, Dimapur, Sushil Kumar Patel, shiba Night Carnival sentong nung mendenbuba lir, pai, Luchii/December ita ka nung nübur ajak südoksenema aser pelashishia amongtsü mechi iba ama sentong tajung ayongzükba atema achaayanger tem nem tenüngsang agütsü.
Iba tenüngsang den külemi DC, Dimapur Sushil Kumar-i, taküm küm carnival sentong nung stall amenokba yimyatem kanga dang meraküta aser liromedema yangluba ajanga taoba küm night carnival sentong dang nungi tajung lir, aser iba inyakyim ya Nagaland nung mezüng asütsü akok, ta ashi.
Night carnival semdanger aser tanga district nungi aruagi benjung atema lija liyongertem ajak Dimapur nung alir senmsopurtem den pelatepba benjungteptsü asoshi carnival mendenbuba, Sushil Kumar-i pelashishia agizüka liasü.
Carnival lapokba sentong nung, Sarah Yepthomi aser Yen Zhimonati ken ajanga telok jangratemdakja aser saksalemdaktsü.
Kasa sentong nung ajaki sapuba Nagaland nungi ‘Lords of the Rocks’ band aser guest band ama ‘Two Fingers’ nati shilem agia liasü.