Dimapur nung 3buba Nagaland Shooting C’ship 2017 alitsü

Dimapur, June 15 (TYO): NRAI Match Book 2016 temzüng kübok small Bore Rifle/Pistol (NR) indang 3buba Nagaland Shooting Championship 2017 ya Aries Sports complex, Bamun Pukhuri-1, Dimapur nung June 21 nungi 24 tashi alitsü.
Para military forces, AI, ONGC aser NRAI nung affiliate süa aliba unit tem nungi Nagaland nung kwi ali, item nisungtemi iba sentong nung unit mesüra state tenüng nung shilem agitettsü, ta Nagaland Rifle Association (NRA) tir, Merang Jamir aser tongti zülur, Sentiyanger nati sangdong ka ajanga ashi.
Iba Championship ya NRA nung affiliate süa aliba Nagaland nungi Club/Academy atema dang lir aser tanga Association/Club tem nungi iba Championship aser Minimum Qualifying Score (MQS) angutsü atema-a shilem magitettsü, ta ketdangsertemi ashi.
Iba tetoktepba nung shilem agitsüpur temi Nagaland Rifle Association nem dang tenüng agütsütettsü.
2017 December 31 tashi nung arishi küm 21 junger alirtem ya iba tetoktepba nung JUNIORS aser arishi küm 18 junger alirtem ya YOUTH category-i yoktsü.
Taoba mapang shilem agiba tejangja malirtem, entry fee malirtem aser Club/Academy nungi temelaba malirtem indang entry form magizüktsü. Item nisungtem ya menur arur (late entries) ka ama züngshitsü aser parnok dang ‘triple entry fee’ meshiba sülen tetoktepba nung tesem azünga aliba nung ajemdaker shilem agidaktsütsü maongka agütsütsü, ta ketdangser ajangasa ashi.
Tenüng mezüluoki alir shooter (Senior/Junior aser Youth) ajunga NRA nung tenüng züluoktsüla aser ‘Shooter ID card’ agizüktsüla, item ID card malirtem iba tetoktepba nung shilem magidaktsütsü, ta sangdong ajanga sa ashi.
NRAI Match Book rule 1.4 nung aliba ama score nguteta alirtem iba tetoktepba nung shilem agidaktsütsü. NRAI Match Book 2016 indang rule 1.4 nung aliba ama score nguteta alirtem 5buba North East Shooting Championship, Shillong, Meghalaya nung 2017 July 15 nungi 20 tashi agitsü aliba nung shilem agidaktsütsü, ta ketdangser ajangasa ashi.
Kasa sangdong ajanga sa ashiba agi, iba tetoktepba ya anepdang 10:30 ako nungi tenzüktsü aser iba tetoktepba nung shilem agitsüpur nem lemzükja aliba tesem nungi dang shilem agitettsü. Iba tetoktepba nung firing points/anogo melenshitsü memelatsü aser shirnoki aibelendir senchi sen 300 alitsü.
Kulikaket agütsüyim
NRAI Match Book 2016 rule 1.4 nung aliba ama jenjang nguteter nem dang kulikaket agütsütsü.
Iba tetoktepba nung temzüng mesüra ozüng melenshitsü asoshi Organizing Committee dak tashi lir. Organizing Committee ajanga lemtet agibaji tatem asütsü. Iba tetoktepba nung shilem agitsüpurtemi yimya tajung amshitsüla aser hotel tem nung ‘shooting practice’ asütsü memelar, ta NRA ajanga metetdaktsü.
Iba tetoktepba nung shilem agitsüpur indang süoshi aser oset tem ya ISSF Rules nung shia aliba ama amshitsü.
Agüja aliba temzüng aser inyakyim nung tali jangjashitsü asoshi NRA tongti zülur den Phone No. 7005595569 ajanga tongteprateptsü asoshi kasa sangdong ajanga sa metetdaktsü.