Dimapur nung Aai Sagi benjung amonger

Dimapur, January 14 (TYO): Nagaland nung alir Mech Kachari kini Dimapur kübok Purana Bazar ‘B’ village football ground nung Aai Sagi benjungmong tan Bodbar nü mongogo.

Alurur amongba Aai Sagi benjungmong sentong nung Kachari sensotem, lokti tentet lenir aser kin balala nungi lenirtemi shilem agia liasü.

Kasa sentong nung Kachari Tribal Council Nagaland (KTCN) Chairman, Ramesh Hasnu-i tongti tesemdanger aser Minority Wing NPF (central) Tir, Bishnu Bhattacharjee o Lipok Pongen nati tetushi tesemdanger ama shilem agi.

“Nagaland sabang ajunga nung tajungba aküm tenzükba mapang ka nung lanurtemi kechisarena ajunga nung takok angutsü asoshi Nagaland nüburtemi pei sobaliba asentenshitsü nungdaka kümogo,” ta tongti tesemdangeri metetdaktsü.

“Sobaliba balala liaka, nüburtemi lungjema alitsü aser pei sobaliba wazüka yur yimji yimjung benshia lokti rendaktsütsüla. Lanurtemia osettsüset yanglutsüren aser aluyimtsüren nung tongti shilem aiga peisasa pei pok mesüba ajanga lokti tali tashi taitba kümdaktsütsü ajungshir,” ta Bhattacharjee-ia ajungshia ashi.

“Nagaland nunger kin ajungai külemi lungjemer inyakba ajanga sabang ajunga nung terenlok lidaktsütsü ajungshir,” ta shia, Mech Kachari nüburtem den Aai Sagi salem osang ka Lipok-ia lemsatepa liasü.

Yashi sentong nung tetsürtemi sobaliba tsüngsang ka tsüngsanga sayuba den külemi, Omot Mech-i ken tajung ka tena sentong nung shilem agirtem ayongzüka liasü.