Dimapur nung alir Ao senso ajak den tepelaba den tayongzükba lemsateper

~ Imtiaküm, PWD Colony, Kohima.

Dimapur nung alir Ao senso tajungtemi Ao senso telongjem lenisüba nung tashi angaa küm aika mapa tajung jenti inyaka aruba angur, ajioda Naga kin aser tanga kintem ajungai nükshia pelaba kuli tejangja lir. Yamaji mapa tajung jenti inyaker ta jangratema repranga alidang ano Naga nunger ajungai rongdak nungdak ta bilema aliba mapa ka, Ao senso telongjem Dimapur (ASTD) ajanga pangzüng renema Dimapur telungtet nung lokti kecha nunga tongti tesemdanger politician mesüra tongti ketdangsur 2016 nungi mamshitsü ta renemogo, anungji alima ajunga pelateper aser asen Aoerji alima tenük lapoktsür tongti ta tanga kinsanger dena pelatepba angur aser angashir. Aji oda, kanga pelaa alidang ano kanga dang tongtipang onuk “kiyimba” (sati benjong) onük nung temelenshi kar bener arutsü nükjitong nung koba 17 March 2016 nü Ao arogotem nung tongti tenzükertem,yimtsüng aser tzükong lenirtem aser Aor kongsang balala nung lenirtem shisalemsateptsü ta angazüka kanga pelar, kechiba süra ano iba onükji tongtipangtiba rongnung ka tanü tendak nung anendaka lir.
Temeshi kiyimbaji Laishibai teyuba aser ibaji kanga dang tongtipang saka tanü asen yimya nung kiyimba sentong ya kangasa khuret tulu aser item ajak ya alima yimya ama ka dang kümogo. Sati benjong ka kodang ayongzükdir alima ajunga okrongdaktsür (iba indang ya aika rasaa mashiyonga ajaki abensaa angatettsü imlaar) saka asen teyanglur Tsüngrem tsüngdangbo iba ama sati benjongji tagizüktettsü asü masü ta iba tasüngdangbajiang tuluba asen molungjangi arur.
Dimapur nung aliba Ao senso tajungtem maneni alima ajungtsü asoshi mapa tajung jenti inyaka angutang kanga pelar aser ano koba onük March 17, 2016 nung lemsateptsü lir, iba nungji sati benjong dak sendakba maparen nung temelenshi tulu bener arutsü asoshi pangzüng tajung renemtettsü imlaa atar, anungji senso tajungtemi alima dak mapetba maparentem nung temelenshi tajung bener arutettsüsa ajaki shilem tajungtiba agidaktsüner aser iba sülenji ano lokti nung temelenshitsü aika lir, anungji itemji ka ken, ka ken ta reprangshia melenshitsü yongyaseta atar.
Tsüngremi Dimapur Ao Senso ajak maneni alimar wadang asoshi moajangma.