Dimapur nung alir Aor kaketshirtemi Chungliyimti semdang

Ao Kaketshir Telongjem Dimapur golden jubilee amongba tenüng nung yashi nungi tenzüka asen lima nung sobaliba aser tamangba yimsü mongjen bushia jajaba sentong nung tanü Hokolbar nü Chungliyimtii semdangba mapang Longtrok nung telok agiba noksa ka yangi angur. (April 13,2018)

Chungliyimti,April 13 (TYO): Dimapur nung Ao Kaketshir Telongjem tenzüker küm 50 ajungba tenüng nung taküm 2018 küm piyong sentong balala agia aruba rongnung yashi Brehostibar nü nungi tenzüka Aor sobaliba aser tamangba yimsü tenzükdak mongjen tonga oagi shisatsü bushiloktsü merangba sentong ya tongtibang ka asütsü.
Iba sentong nung tanü Hokolbar nü Golden jubilee planning committee züngsemtemi anir lanurtem parnok 70 shi Chungliyimti nung oagi Longtrok tesem aser Yimsenpirong tzübo semdanga jajaogo.
Chungliyimti nung alirtemi jung kanga jungasa yangluba agi tangar aika parnok dang nungi jung aliisa aru, iba jagi iba yim tenüng Chungliyimti ta jatet. Iba jakdangbo iba yim dang Metitangkong ta jaa liasü ta Chungliyimti nunger tebu tedi Pitongse-i ashi.
Chungliyimti kümer kum ishika tsüngda nütsüng kanga renloka ao. Iba mapang Chungliyimti nung kibong meyi tuku liasü ta tsüraburtemi jembia aru. Iba jagi Chungliyimti nung alirtem yim tasen akümi aotsü tenzük. Iba sülen yim aika küma aoba agi tsüraburtemi Ao yim semer ta jembia aruba tanübo Ao yim noklang jungogo.
Tanü Dimapur nungi arur lanurtemi Yimsenpirong tzübo semdangdang yangji tzü temerük sünga atsüngdena liasü. Iba tzübo nung ya tzü kodanga makonger ta angazüker. “Yimsenpirong tzübo ya Chungliyimti nung Jamir lushi nung liasü saka tangbo alu melentepba agi Thsangdang nunger lushi nung lir ,” ta yangji alir tebu tedi kati ashi.
Akhi mapang nung, Chungliyimti nung atalokba mapatem indang kuli bushitsü asoshi Nagaland university aser Nagaland Art & Culture department nati yaritepa ali tua bushiba mapang nisung liasüba kibong kar bushitetogo.