Dimapur nung Angh-i Rahat Medical Mission lapoktsüogo

March 28, 2016 nü District Hospital Dimapur nung Nagaland Angh, PB Acharya, Rotary Club Dimapur züngsemtem aser Rahat Medical Mission nungi züngsemtem den külemi tangokba noksa ka angur.

Dimapur, March 28: Sensakertem aser nüngdakbapur shirangertem nem medical teyari agütsütsü nükjidong nung Hombarnü Nagaland aser Assam Angh, P.B Acharya-i District Hospital Dimapur (DHD) nung anogo 9 nü Health camp- Rotary Rahat Medical Mission (Free Surgical camp) lapoktsüogo.
Iba camp ya Rotary International district 3080 & 3240-i ayongzüker aser Nagaland sorkar, CIHSR (Referral Hospital) aser Dimapur Rotary Club temi teyari agüja nungiter.
Tongti tesemdanger o jembidang Acharya-i, mainland India nungertem dang Nagaland aser Northeast state tem indang tangatetba melenshitsü ayongzük.
Nagaland-i arutsüji lendong lir ta nisungtemi bilemer, ajisüaka atangji nungbo ibaji tai, ta Angh-i ashi.
Angh Acharya-isa, “Iba anogo ya Nagaland atema tongtibang anogo ka lir, kechiyong iba mission atema linük tesem balala nungi doctor tem aika longjemogo,” ta metetdaktsü.
Angh-isa “Northeast nung doctor tem aser lokti atema inyakertem aika lir. Iba camp ajanga asenok tangatetba ka akümtsü atema asenoki bilemtsüla,” ta pai ashi.
Iba sentong nungsa Acharya-i, Nagaland nung Medical College kabo lapoktsü telemtetba agiba metetdaktsü aser state semdanger doctor tem dang iba college atema tesayurtem aser doctortem bushiba nung yaritepdaktsünüba olen ka shisem.
Paisa ashiba agi, Northeast nungi nisungtem nüngdak balala atema tanga tesemtemi aoer, saka tanga state tem nungibo tetsübu ajanga Nagaland-i maruner. “Iba tesem nungi faculty aser professional tem nüngdaker,” ta pai ashi.
Iba sentong nung tetushi tejaoker, H&FW, Nagaland Principal Director, Dr. Sukhato Sema-i Rotary Club Dimapur dang pelaba lemsatepba den külemi H&FW department-i Rahat Medical Mission takok angutsü atema takokba tashi yaritepsü aser nungittsü, ta nangzük.
Kasa sentong nung Dimapur Deputy Commissioner, Kesonyu Yhome (IAS), CIHSR Director, Dr. Abhraham, Nagaland Medicine Dealers Association nungi Basu Damani aser MS, DHD nungeria o tatsütsü jembia liasü.
Iba camp nung initial screening aser OPD ji DHD nung agitsü aser surgery ji DHD o Referral Hospital Dimapur naprong nung agitsü.
Iba camp nung nüngtugu doctor tem aser Ophthalmology, Plastic Surgeons, General Surgeons, Genealogy, Ortho, Anesthesia, Dermatology aser Urology  specialists nungi  teyaritem angati angutsü.