Dimapur nung ango metsürtem nem ango chiyungtsü angati agutsü

Bodhbarnü Brooder Fish Farm, Nagarjan nung Deputy Commissioner, Kesonyu Yhome, Addl. Director Imtitongzuk Longkumer, DPRO, Dimapur Lolano aser tangartem külemi tangokba noksa ka angur. (Dimapur, March 29, 2017)

Dimapur, March 29 (TYO): Linük nung ango jenti mesütettsü nükjidong nung Centre sorkar mapatong, Blue Revolution (NEEL KRANTI) kübok Bodhbarnü Fisheries department-i Brooder Fish Farm, Nagarjan nung ango metsürtem nem floating fish feeds angati lema agutsü.
Iba sentong nung jembidang Dimapur Deputy Commissioner, Kesonyu Yhome-i, ango timba metsütetba linüktem tanabuba jenjang nung India lir, aser linük nung nisung million 14 bo chiyunga taküm alitsü atema ango metsüba nung metaloker alir, ta metetdaktsü.
“Kodang asenoki Nagaland sasep nung reprangdangdir, aiben schemes aser projects junga meinyakba ya tesasatsüka lir,” ta paisa ashi.
Tanübo state nung aluyimertem anogoshia tajemba akumer, ta shia pai ango metsürtem dang, pei nüngdak peria taküm litettsü atema department-i kechi teyarisa agutsüdir itemji timi shisa kaa amshitsü ajungshi.
Ango tzübo anepalutsüji tongtibang ta shia Additional Director, department of Fisheries, Imtitongzuk Longkumer-ia tajangzük angurtem dang project ajunga takok angutsü atema department den amalitepa inyakdaktsüner, ta ayongzük.
Paisa, tarutsü nung ango metsürtem atema training agutsütsü, ta metetdaktsü.
Iba sentong nung department-i ango metsür parnok 50 shi nem floating feeds angati aguja liasü.