Dimapur nung anguba tasümang jangjaogo ; DMST & DMPK nati kukua aitsür

Dimapur, March 22 (TYO) : March 21, 2017 anepdang D.C. office, Dimapur anasa Hill view Colony nung tasümang ka anguba jangjaogo.
Iba nisung ya Mongsenyimti nunger asür, Lanunukshi Pongen ta jangjaogo aser Bodbarnü pa indang mang West Police Station nung S.I. Kaito Sumi-i Nungsang Jamir, NPF President, Dimapur Unit, Island Colony ket nung agütsüogo.
Asür Lanunukshi Pongen ya asür Aozulu’er jabaso lir aser pa December 11, 1991 nung asoba liasü.
Dimapur Mongsenyimti Senso Telongjem (DMST) aser Dimapur Mongsenyimti Pongener Kidong (DMPK) nati sangdong balala nung, asür Lanunukshi Pongen tepsetba kukua aitsüba metetdaktsüogo.
“Mejangjatetba nisungtemi ozü senso Lanunukshi Pongen tepsetba kukua aitsür. Shiametetertem aliba loktiliba ka nung meimchir anema iba ama tesempatsü mapa inyakba magizüker. Anungji, ozüng amertemi iba tatalokba atema bushisüngdanga aibelenertem pur tapet temerenshi agüjang ta akhanger” ta DMST-i sangdong nung shia lir.
“Mongzüi an sür oa tepsetba medem, mejangjatetba nisung tepsetertemi ozü senso tajung tepsetbaji magizüker aser kukua aitsür” ta DMPK-ia sangdong ka nung metetdaktsü.
Iba tatalokba ya ozüng amertemi kanga junga bushisüngdang asütsüla aser yimjak nung metetdaktsütsü akhanger aser iba amaji meinyak tashi Dimapur Mongsenyimti Pongener Kidong-i ola madoki malitsü, ta DMPK-isa ashi.