Dimapur nung Ao Kaketshirtem arangshir

AKTD Hon Jubileemong sentong lapokba mapang Aoyimti Kaketshir Telongjem-i shilem agiba angur. (Dimapur, Dec. 7, 2018)

Dimapur, December 7 (TYO) : Dimapur lenden lima nung Ao Kaketshir Telungjem tentetter küm tenem ajungba benjongmong sentong tuluka tanü Hokolbar nü Senden Reju nung ‘ Arangshidi’ omen nung takok ngua agiogo.
Iba sentong nung tayongzükba o jembidang, Dimapur nungi adoksang, MLA Wb.Moatoshi Longkünmeri Ao lanur aser kaketshirtem dang terenlok mapatem ajak nung shilem tajung agir kaka asütsü ajungshia liasü.
Lanurtem ya tarutsü atema dang masü saka tanüa alima ajungtsü asoshi inyakba mapatem nung shilem agir kaka küma litettsüla ta paisa ayongzük.
Iba jubilee mong omen “Arangshidi” nung ajemdaker, Sustainable Development Forum Nagaland (SDFN) nung Executive Director, Wb.Amba Jamir-i jembidang, tanü putu ya asenok asoshi arangshitsüba aser asentenshitsüba mapang lir, kechiyong maparen aika nung asenok sobaliba aser inyakyim aser tenüng dena samaa odagi ta metetdaktsü.
Aluyimba tsütsüa tsük tapu ka samadaktsüba agi iba tenüng aser aluyimba inyakyim samar aser iba jagi shisatsü aser oshi dena samar ta paisa ashi.
Tanü putu nung yabo tazüngba degree agi masü saka mapa inyak metetba agi taküm alir aser alima yaritetter, anungji kaketshisatsü bushidang degree masü saka shtakba shisatsü bushitsüla aser kechisüdirsüaka piesasa pei teka agi mapa kabosa inyak ashitsüla ta Wb.Ambaisa ajungshi.
Joko asenok rongnung sayutsüngi masü saka shisa lemsatepa sensaksem tenzüktsüla. Asenok dak tarutsü mangdang alitsüla aser iba mangdangji mapa kümdaktsütsü asoshi asenok rongnung lemsateptsüla , iba jagi asenoki shisa angazüktsüba aser mapa küma inyaktsüba len shitak ngutettsü ta paisa metetdaktsü.
Iba kasa sentong nung Ao Senso Telungjem Dimapur nung Tir Wb. L. Wati Jamir; Ao Kaketshir Mungdang nung Tir Wb. Imkongwati Longkumer, Dimapur Watsu Telongjem nung Tir Wt. Yarsangla aser Ao Kaketshir Telungjem Dimapur nung taoba tir Wb. I. Anungba Sanglir nungertemi tepela aser tajungshi o lemsatepa liasü.
Iba benjongmong sentong nung tongtibang kaji, kaketshirtem asoshi Rev L. Kari Longchari-i temoatsü meshija sarasademtsü.
Iba sentong nung DABA youth choir, Aoyimti Kaketshir Telongjem, Dimapur Ao Lanur Telungjem aser Diphupar Ao Kaketshir Telungjem temi sentong meraketa shilem tajung agia liasu. Kasa sentong nung Ao Kaketshir Telungjem Dimapur Tir Wb. Lanutoshi Aier i telok pela agizuka jembi aser Jubilee Planning Committee nung Convener, Wb.K.Temjen Jamiri shilem agir aser tenla agütsürtem ajak dang pelaba metetdaktsü.
Iba sentong tenzuka Dimapur Ao Baptist Arogo sannuker Rev I. Wati i sarasadem aser Diphupar ‘B’ Ao Baptist Arogo nung sannüker Rev. Lanuakümi sarasadema sentong atem.
Iba sentong nung tanir Dr.Sangmong Longchar aser Kr. Meyisangla Jamir na liasü.

AKTD Jubilee nung kaketshirtem tenangzükba
Dimapur lima tashi aruagi senso küma alitsüsa moatsüba Tsüngrem temeim mamai nübortem asoshi teyarir senso tajung kaka küma litettsüsa :
1. Kaketshisatsü bushiba maparen nung shitakba shisatsü aser temetetba angur asütsü;
2. Mapa kecha nunga tangar dak metaloker malitsü;
3. Mapa ajak nung ochishia aser meranga inyaktsü.
Iba tenangzükba ya nie tanü 7th December, 2018 anogo Ao Kaketshir Telongjem Dimapur Hon Jubilee amongba senden nung nangzüker.