Dimapur nung Ao kaketshirtemi süngdong atem

Senden Reju, Dimapur nung süngdong atemba mapang lokti noksa agiba yangi angur. 

Dimapur, June 05 (TYO) : Mongolbar nü alima ajunga nung lipukümmong (World Environment Day) amongba den külemi Ao Kaketshir Telongjem Dimapur (AKTD) Golden jubilee küm amongba tenüng nung Ao kaketshirtemi süngdong atemba sentong ka ayongzüka agiogo.
Tanü iba sentong nung Ao kaketshirtemi süngdong atemba tesemtemji, Naga Cemetery, Inter State Bus Terminus (ISBT), Dimapur Government College aser Senden Reju Dimapur tesemtem liasü. Tanü item tesemtem nung atemba süngdongtemji AKTD kübok aliba yimtsüng kaketshir telongjemtemi pei pei yim tenüng nung tema liasü. Item kaketshirtemi tanü süngdong tema toktsübaji tain maküm tashi kasa yim kaketshir telongjemi anepalutsü ta kaketshir lenirtemi metetdaktsü.
Item süngdongtem koba yimtsüngi tajungba tain kümdakja anepaludir, parnok nemji sen sempet agütsütsü AKTD Golden Jubilee Planning Committee-i lateta lir. Iba senpetji taküm küm tatemlen Jubilee shibangba sentong nung agütsütsü. AKTD purtem ya taküm küm piyong Jubilee sentong tapu balala ayonga monga arudagi.
Tanep Mongolbar anepdang süngdong atemtsü tenzüktsü atema sentong tatsüka Senden Reju, Dimapur nung akadang, Forest department tenüng nung , Wb.Vivika A.Sema, Forest Range Officer-i AKTD purtemi alima nung tzü mopong jungdaktsütsü atema iba ama sentong tajung ayongzüka agiba pelaba metetdaktsü. Paisa kaketshirtem dang alima nung tzü mopong wazüka ayutsü bilemba dang masü saka tzü mopong teti junga alitsüsa asenoki inyaktsüla ta ajungshi. Paisa taküm küm alima lipuküm omen nung ajemdaker, plastic amshiba ajanga alima memenentsüsa mapa agi inyaka sayutsü ajungshi.
Iba kasa sentong nung tarur pelaa agizüka jembidang, taküm küm kaketshirtemi süngdong atemba yabo süngdong tila temoka yutsüba nungji matembanger saka itemji tain maküm tashi anepalua indaktsütsübaji kaketshirtem mapa asütsü ta AKTD tir Wb.Lanutoshi Aieri metetdaktsü.
Iba sentong nung AKTD tongti zülur, Wb.Moayanger Jamir menden liasü aser AKTD Golden Jubilee Planning Committee nung tezülur Wb. Mozen Aier-i shilem agirtem ajak dang pelaba metetdaktsü.
Iba sentong tenzüka East Dimapur Ao Baptist Arogo nung sannüker, I.Jongpong Imsong-i sarasadem aser Dimapur Watsu Telongjem nung tir, Wt. Yarsanglai sentong tembanga sarasadem.
Iba sentong meraketdakja aser kaketshirtem ajungshia DABA nung Associate pastor Toshi Longkumer, Ao Senso Telongjem Dimapur nung tir Wb. L.Wati Jamiri anir ketdangpurtem, Dimapur Watsü Telongjem nung mendenpurtem aser Dimapur Ao Lanur Telongjem nung lenirtem dena liasü.