Dimapur nung Aor lanurtemi Sorkar mapa inyaktsü tang mebilemi tzümar den toktepa shishilembaba mapa inyaktsü aposur

~ T. Nokpang Jamir. Rtd. Teacher.

Septemper 5, 2015 anebdang Tir Yimyim osangkaket nung Aor lanurtemi sorkar mapa dang meimlai peisasa meranga tzümar ama Dimapur nung shishilembaba inyaktsü mulungtetba osang angshia ni kongang mali pelaba agi tajungshiba den külemi sayubentsü lenmang kar shinür.
1. Kechi mapa inyakdir yangji takokba aser temoatsü dang ali masü tamakok aser takoksa a lir ta metettsüla.
2. Ano customer den jimbishinütsüba yimya tajungtemji mamadoktsüla.
Küm asem shi süia ogo, Dimapur nungi atuba Aotsür ana Mokokchung nung Aotsür dokan ka nung oset kar alitsü atema jimbitepba ni angashi. Dimapur nungi atuba tetsür (Dimapurwala) Mokokchung nung dokan wala dang asüngdang-Tenü, ya sen kwi meshir ? Mokokchung walai langzü-oya sen tir meshir. Dimapur wal no 2 ashi, Rapi, Dimapur nungbo ya sen tenem agi angur a to? Mokokchung walai ashi, oyala anaji nenabo Dimapur lur sen tenem jagi alir atung ta shir osetji yua adok.
Dimapur wala jagia osetji car hire sür-ang lenden lima nungi bener atuba agi Dimapur nung meshiba ama masü ta angatet asübo jungla. Mokokchung wala jagia Customer-la ana dangji Mokokchung atongdang sen koma aor aser rateta shir sendong nungi ajema mesüra ali tiyongi aru asübo koda jungla. Aor aser Aotsür shishilembaba mapa inyakertem ajak dang kanga pelaba den ano teti mamadoki alitsüba shin o ka bilemtetdaktsür –
“Tzüjang tilala Atsüngdenba agi tzüyim akümer.”

—————————————————————————————-

Sensaker meimsang Yashi Aeir tenüng asanger

~ S. Nuken Longkümer, Kohima.

Bill Gates ya alima ajunga atema takar akümsang, Tsüngrem temeim metetba nübu, shirangertem, HIV-agi kangshirtem yipru mopong agi timatemertem ajak asoshi aria bilemsang Bill Gates U.S lima sotet. Yamaji asen tsürabur wabong Yashitsüngba Aeir Süngratsü lima soteta tanü Nagalima nung sensaker yarinüsang tenüng asanger. Asen tsürabur wabong Yashi Aier, pa taküm otsü aser pa mapa reprangdangra jangratemtsü aser tesüngmangtsü temeim agi sünga aliba angutsü. Pa ama takar tetemjen nübo ka dak ariabilemba temeim sempet tulu angudang temulungjang taroktiba den jembidaktsür. Naga nunger sensaker dangbo taochi sayutsü ta zülua angudang to, sensaker aika nüktzüyima alitsü südi!! Sensaker tenük nungi nüktzü aluba kodanga amajok masütsü. Tsürabur Wabong Yashi Aeir den jembibaji Naga nunger ajak den jembir ama kümdakjangma. Tsürabur Yashi Aier ama Naga nunger takartem aser Aor takartem den jembiang ta teyanglur Tsüngrem dang sarasademtsüdi. Temeim akaba tsürabur taküm ozü sensaker mechi arishia moajang. Tanü alima ajunga nung temeim indang jembir, amajok nung temeim otsü jembiba tamangertem aika angutsü! Onsara o tanang, kodanga jashia mesayur saka pa mapa den meputepba Khristan taküm aika ajurutsü.