Dimapur nung Aor sannükertemi angh dangi zülu

Dimapur, August 12 (TYO) : State nung anghji temzüng ozüng madak tekolak lir, anungji linük temzüng nung aliba ama tamangba yimsü ka tsütsü balaka tejak meshitsüi ajak akümtsübua amshitsü imlar ta Dimapur Area Ao Baptist Pastors’ Felowship-i Nagaland governor dangi züluba shidi ka nung metetdaktsüogo.
Kija taküm ka ama, nai na amangnütsü tamangba yimsü amangtsü akok aser nü tamangba yimsü yaritsüa akok, ajisüaka linük temzüng madak tashi aketba nisung asünungji temzüng nung shia aliba ama tamangba yimsü ajak akümtsübua inyaktsü imlar ta Ao sannükertemisa ashi.
Naga nungertem ya tamangba yimsü ajak akümtsübua amshiba kin ka lir, iba jagi Naga lima tesem balala nung tamangba yimsü balala meyong tekülemdak ki angutsü aser India tesem balala nung telok tulubai tenla ki tashi raksaja amokmerenaka, Naga lima nung iba ama tatalokbaji mangashitsü ta sannükertemisa angh dang ashi.
Nagaland nung kodanga Raj Bhavan nung aliba nisungi tamangba yimsü ka tsütsü dang atsünga oa inyakba otsü ataloka mangu, ajisüaka tangbo Raj Bhavan nung aiben tamangba yimsü ka tsütsü atsünga inyakba ajanga aiben nübortem rongnung ken o buluba angashir. ” Iba kasa jaklaji bener Raj Bhavan nung ali tashi nai nü tsüngrem shiba tenüng nung tenangzükba agir na angh menden nung amer iba Tsüngremji mezüngmeshir asütsü ta sannükertemisa metetdaktsü.
Linük nung VHP/RSS ama teloki yaria akümba sorkari linük nung Khristan-tem reshikangshiba anema kecha mashi toktsüba ngua Nagalang aliba Khristantem dena shisabolua bilemer, anungji tamangba yimsü ajak shitak amangtettsüla ta sannükertemia metetdaktsü.