Dimapur nung Aor yimsüsürtem den sensaksem

Dimapur, Oct.25 (TYO): Ao Senso Telongjem Dimapur (ASTD) kimen Wb.Yashitsüngba’er kidang yashi Honibar nü tang Nagaland Legislative Assembly (NLA) nung temendak Aor yimsüsürtem den ASTD, Kohima Aor Telongjem, Chumukedima Ao Senso Telongjem, Ao Senso Telongjem Medziphema nungi lenirtem adenshia shisalemsatepa sensaksemba mapang tajung ka agiogo.
Iba senden nung adener NLA nung Aor züngsemtem rongnung Dimapur-II A/C nungi adoksang Wb.S.Imtisungit Jamir, Koridang A/C nungi adoksang Wb.Imkong L Imchen, Mokokchung Town A/C nungi adoksang Wb.C.Apok Jamir, Aonglenden A/C nungi adoksang Wb.Imtikümzük, Impur A/C. nungi adoksang Wb. Dr.Imtiwapang, Alongtaki A/C nungi adoksang Wb.Dr. Benjongliba aser Jangpetkong A/C nungi adoksang Wb.Dr.Longri nungertem liasü. Tangar züngsemtemji tesem balala nung tanga sentong nung aliba ajanga medentet.
Iba senden nung tang teyangludak aliba tenemtsüng lenmang nung ya sangküm nungibo gari senzütettsüsa maneni inyaka aotsü atema sorkar tsütsü senotsü lenmang bushiteptsü lemtet.
Iba maparen nung nübortem o sorkar na tsüngda tongtepratepa inyaktsü atema yimsüsürtem rongnung Dr.Benjongliba aser Dr.Imtiwapang na teloki mulunga shimtet.
Iba denji ano tanü Naga lima nung yimten aser lokti tebilemtsü indang ken o taret benoka shisalemsatepa liasü. Iba senden nungsa, kasa shisalemsatepa sensaksemba sentong ya memenui Mokokchung nunga Ao Senden akhüm nung alitsü atema asüngdangtsü lemtet.
Iba senden ya ASTD ajanga Naga nunger asoshi Aor khuret lemsateptsü atema ayongzükba sensaksem sentong ka liasü.