Dimapur nung Aortem nübodoka amung

Dimapur, October 2 (TYO) : Honibarnü Dimapur nung aliba Aortemi tongtipang tesem asem – Zion Hospital, Naga cemetery aser Dimapur Airport nung lokti nübodoka mapa inyakogo.
Iba sentong ya Ao Senso Telongjem Dimapur (ASTD)-i küm asembuba atongtepa ayongzüka agiogo.
ASTD kübok aliba yimtsüng ajaki tanep 6:00 ako nungi 9:00 ako tashi pei pei lemzükba tesem nung mapa takok ngua inyak.
Tanü Zion hospital aser Purana bazaar tsüngda gari lenmang raksa aliba nung lung aser lisem toka yanglushi, kilentzü aodak merüktet aser Zion hospital complex nung aliba süngdongtem nung shini tepa yutsü.
Ano külen, Dimapur Airport aser Naga cemetery nung arem merükteta chidok aser Watsu Telongjem Dimapur o Ao Lanur Telongjem Dimapur nati yangluba signboard Zion hospital aser Dimapur airport nung yutsü.
ASTD-i sangdong ka ajanga Airport Authority of India (AAI), Zion Hospital Management, Naga Council Dimapur, District administration aser lokti nübudokba nung shilem agir ajak dang pelaba metetdaktsüogo.