Dimapur nung apu ka chirep, nisung 4 asü & pongo yiru

Dimapur, July 11 (TYO) : Tanü Mongolbar nikongtsütsü 5:00 ako shi nung Dimapur nung Referral Hospital ( anasa aliba Dhansiri apu chirep aser iba lendong nung nisung 4 süogo aser pongo yirua lir.
Iba lendong nung gari kar apu ajanga toudak nung atalok aser tasürtemji auto rickshaw nung mena liasü ta angazüker.
Iba yin apu ya Nagaland nung apu tejentiba rongnung ka lasü. Iba lendong ataloker külen iba osangbeneri Diphupar Police station nung Officer Incharge den jembidang, iba lendong atalokdang apu nung toudak aliba gari kar apu den külemi ayonglen tsüok aser lenmang mali akümba ajanga gari aika mouteti anendena lir ta ashi. Iba lendong nung asüama aser timtem ataloka alirtem kümzüktsü asoshi nübortem den policetemia yaritepdagi ta paisa ashi. Asürtem rongnungji tetsür ana aser tebur chanu ka zünga tebur ana liasü ta paisa metetdaktsü.
Iba apu ya kanga tejen kümer tashimait akümba ajanga 2015 küm June ita nung PWD (R&B) departmenti nisungtem dang mesenzütsü asoshi osangbo metetdaktsür liasü saka meshibangi gari tilatembo odang senzüdaktsüba agi tanü iba lendong atalokogo.
Ano iba temeket nung alirtemi ashiba agi apu tekulen ayong nung nisungtemi lisem aser longsang agitetba ajanga apu tangitba tongshiji tashi mait kümdaktsü.
Iba atemaji nübortemi government dang aiben shiogo ta parnokisa ashi.
Osang ajanga angazükba agi, PWD (R&B) department-i iba apu ya atemtsü asoshi sen crore 37 jenjang mapabo agütsüogo aser iba mapa inyaktsü purtemi mapa tenzüktsü lia iba lendong atalok.
Tanü iba lendong nung asürtem ya Tripura nungi aruba ayanger tsümartem liasü ta Dimapur Deputy Commissioner, Kesonyu Yhome-i metetdaktsü.
Iba osang zülu tashi nung apu chirepba nung gari pongo magiteti liasü aser nübortem den Dimapur district administration aser policetemi lendong ajururtem yaria liasü.
Tanü Dimapur nung nisung taküm samatsüsa Dhansari apu chirepba lendongji Nagaland government kübok PWD (R&B) purtemi ochimashi inyakba aser anepalu masüba aser district administration-i junga mereprangba ajanga lir ta ACAUT teloki aitsü.
Anungji, tanü iba lendong nung asüama lendong ajurur kibongtem nem temenok shitak agütsütsüla aser police-i PWD (R&B) minister aser Executive Engineer (PWD), Dimapur division, ayong nung lisem aser long agiteta abener aser contractor-tem aser item mapa inyaktsü melar village council purtem ajak aputsüla ta ACAUT-i takangba ka agütsüogo. Iba atema parnoki Diphupar Police Station nung FIR ka agütsüogo.
Ano, ACAUT-isa Chief minister-i R&B minister menden nungi agientsüla aser iba lendong atalokba indang bushisüngdangtsü asoshi High Powered Independent Inquiry Committee ka shimtsüla ta takangba agütsüogo.