Dimapur nung apu yangluba asadangtsü atema senden amen

Dimapur, Tsüklai 10 (TYO): Tsüklai 09, 2018 nü Dimapur Deputy Commissioner, Sushil Kumar Patel, IAS-i pa indang office nung PWD ketdangsertem den senden ka mena tang Dimapur nung apu teyangludak asadanga liasü.
Iba senden nung Dimapur DC-i E.E PWD (R&B) aser UDO dang tang teyangludak aputem achaayanga repranga yangludaktsütsü tuyu.
Sushil Kumar Patel-isa department dang, tzüngluruwa metenzükdang mapang shidak nung apu tembanga meyanglutettsüsa süra nüburtem tim matemtsü atema tanga lenmang bushia inyakang, ta metetdaktsü.
Senden nung E.E PWD (R&B)-i tang Dimapur nung teyangludak apu asem- Nagarjan, Dimapur nung aliba Dhansari apu nung RCC Girder bridge teyangludak, Referral Hospital anasa Chathe ayong nung RCC Girder bridge teyangludak aser Vihokhu village matongdang Bailijan nung RCC Girder bridge teyangludak osang tongmelang agi metetdakja liasü.
Engineer-isa, aputemji tanen makai yangludar, ta shisem.
Senden nung adenertemisa Dimapur yimti (106.9km) nungi Patkai bridge (124.20km) tashi lenmang tajungba akumtsü atema EE, PWD (NH) Dimapur nem ‘Right of Way’ (ROW) agutsütsü lemteta liasü.