Dimapur nung army temi Chathe ayong nung apu yanglur

Kohima, December 20 (TYO): 4th mile, Dimapur nung Chathe ayong nung apu taküm July 11,2017 nü chirepba sülen Nuiland area nung alirtem kanga timtema arudar; army temi yaritepa iba apu yanglu tenzükogo, ta Col C Konwer PRO (Defence)-i sangdong ka ajanga metetdaktsü.
Iba tesem nung yimtsüng 100 dak tema nüburtem anogo shia iba apu ajanga senzüa liasü ajisüaka iba apu chirepba ajanga nübur jenti timtemdar, talisa kaketshirtem aser shishilembartem kanga takoksa ajurudar.
Iba ama tensa ka nung Civil Administration, local communities aser Col S Rengma-i aniba Naga Ex-servicemen Association (NESA) densema lokti tentet balalai iba apu yangutsü atema Lt Gen Anil Chauhan, General Officer Commanding Spear Corps ajurua teyari meshi, ta sangdong nungsa shia lir.
Dimapur aser Nuiland nung alirtem timtemba tia angateta Engineers Unit of Spear Corps-i 4th mile nung aliba Chathe ayonga ajangdanga senzütsü atema apu ka yanglu tenzükogo.
Iba apu ya taküm Khristmas matongdangsa nüburtem atema lapoktsütsü, iba sülen tongti apu meyanglu tashi amshia atatsü. Spear Corps-i achaayanga iba mapa inyakba ya ajanga nüburtem atema bilemtsüba aser Army temi Naga nunger den amalitepa aliba sayur, ta kasa sangdong nungsa shia lir.