Dimapur nung auto anishirtem nem mini dustbin agutsü

Dimapur, May 22 (TYO): Bodhbarnü Tourist Lodge, Dimapur nung jana meindokba tesem indang sensitization programme ka auto anishirtem den agi aser parnok nem mini dustbin lema agütsü, ta ketdangsertem osang ka ajanga metetdaktsü.
Iba sentong ya CAN Youth den Better Dimapur aser Dimapur District Autorickshaw Drivers’ Union (DDADU) senteper ayongzük aser Dimapur Municipal Council (DMC)-i yarisema liasü.
Iba sentong nung auto anishirtem nem mini dustbins 20 angati lema agütsü. Jana takong bendentsü atema mini dustbin ji auto rickshaws nung alenloktsü. Mini dustbin ya tarutsü nunga shilem küma lemsar lema agütsütsü sentong lir.
CAN Youth tentetsang, Jenpu Rongmei-i, tang mezüng telok balalai ayongteper iba project tenzüker, aser iba ya ajanga pei libajen merüka ayutsü atema nüburtem nem tangatetba agütsütsü imlar, ta metetdaktsü.
Paisa auto anishirtem dang jana indokba tesem nung dustbin ji azüngteta indoktsü metetdaktsü.
Kasa sentong nung DMC office Superintendent, Ganesh Sharma aser DDADU Tir, I Vitoshe Sema natia jembia liasü.