Dimapur, January 13 (TYO) : ULB elections atema Ward 22, Dimapur nungi BJP candidate Hokuto Zhimomi’er kimung nung Brihostibar aonung 9:25 ako meta mejangjatetba nisung kari bomb ka pokdaktsü.
Iba lendong ya Dimapur kübok Veterinary Colony, Burma Camp nung atalok saka tia kaa nisung shinga yiruyibong masü.
Iba mapang Hokuto Zhimomi kidang maliasü aser bomb ji par kimung nung anena aliba Maruti Alto gari ka anasa apok. Iba mapang par kidang nisungtem adenshia liasü aser bomb pokshiba ajanga nisung kar dak kongshi saka parnok balaka meyiru.
Ibala inyakyim ya BJP candidate aser party züngsemtem atema dang masü saka public nema tetsübu bener arutsür. Candidate tem lendongbang nung lira, election dak sendakba maparen nunga tetsükdaktsü ajurutsü, ta Dimapur nungi BJP tenüng nung tokteptsü aliba candidate temi sangdong ka nung ashi.
Iba inyakyim ya nisung taküm agitsü meranga inyakba lir, anungji police-i election dak sendakba maparen metembang tashi candidate nem security agütsütsü mepishir, ta parnokisa ashi.
Maneni, Police-isa iba mapa inyakertem bushia aputsü aser iba tasa atongertem puteter ozüng tapet agi merenshitsü akhanger. Tarutsü nung iba ama mesükba lendong mataloktsü atema police-i teinyaktsü tim mapa inyaktsü nenshia metetdaktsür, ta parnoki shisem.
Iba sangdong agütsüba BJP candidate temji, Hokivi Chishi ward 19, Vikheho Zhimo ward 17, Simon Yeptho ward 23, Yangertoshi ward 10, Moa Jamir ward 16, G. Kits ward 20, Kavili ward 21, Meweu Lasuh ward 1 aser Ikato ward 7 nungertem lir.
You must be logged in to post a comment Login