Dimapur nung cancer agi shiranger anepaludak mozü ki lapoker

Dimapur, Aug 27 (TYO): Dimapur nung cancer agi shirangertem anepaludak mozü ki tajung ka tenüng agi Eden Medical Centre (EMC) tanü Honibar nikongtsütsü Nagaland Health & Family Welfare minister, Wb.P. Longon-i lapoktsüogo.
Iba mozü kidang ya cancer tashidak dang masü saka tanga tashidak agi shirangertema dena reprangtsüsa doctor peria dang lir. Iba mozü ki lapokba ajanga Nagaland nung alirtem dang masü saka temeket alir Norhteast state-tem nungi nisung aika taneptsü angutsü imlar.
Shitakba agibo iba mozü ki ya chief minister, T.R Zeliang-i lapoktsütsüba liasü par kinunger asüama tia ka ajuruba ajanga marutet.
Iba mozü kidang ya yipten 100 lir aser item rongnungi ICU yipden 10 lir. Iba ki renemtsü asoshi küm pongo agia liasü.
Tanü iba sentong nung jembidang, Dr. Lima-i ashiba agi, EMC ya Northeast India nung aliba private hospital-tem rongnung cancer agi shiranger anepaluba oset IMRT (Intensity Modulated Radiotherapy) Linear Accelerator amenokba mezüngbuba asütsü. Iba mozü ki ya tanüang semzükaka, shirangertemi mepishiba ajanga shirangertem anepalutsübo yaküm 2015 küm nungi tenzük.
Iba mozü kidang cancer agi shirangertem anepalutsü asoshi Radiation Oncology aliba den ano Radiology aser Imaging, General Medicine, Surgery, Obstetrics & Gynecology,  Anesthesiology aser Intensive Care Unit, Dentistry, Pathology, Orthopedics aser ajungben temang mejungi arurtem anepalutsü asoshi doctor tajung peria yua lir.
Naga nungertem cancer agi kanga shiranger aser itemji Nagaland nung anepaludak maka timatemba ngua tebu tedi Yashitsungba Ao-i iba mozü ki ya lapok. Ano, paisa Dimapur nung Zion Hospital lapoka lir.
Iba sentong nung jembidang, Longon-i ashiba agi, Nagaland nung cancer agi shirangertem teimba akümer anungji aji meteta nübortemi achiajem aser taküm yimya azüoka kümdanga alitsüla. Naga nung shirangertem tangaleni taneptsü bushia aodang senotsü aika endoker aser karbo kimonglumong dena yokdoker aoer, ajisüaka tanü iba mozü ki lapokba ajanga item timtem nung jagi nübortem kümzüktsü ta Longonisa metetdaktsü.
Paisa iba mozü ki lapoksang tebu tedi Yashitsüngba nem  tenüngsang agütsü.
Iba kasa sentong nung Ao Senso Telongjem Dimapuria tebu tedi Yashitsüngba nem tenüngsang agütsü aser state sorkar dang EMC lenmang tin ali lenjem nungi Army TCP gate tashi dang Yashitsüngba Road ta jadaktsünüa temepishiba ka agütsüogo.
Dr. Lima Imchen (MBBS, MD Radiotherapy), Director & Consultant, Department of Radiation Oncology-i tarur pelaa agizükba den mozü ki indang temetetettsü kar metetdaktsü .
Ano B.R. Ambedkar Institute-Rotary Cancer Hospital, AIIMS, New Delhi nung tongti ketdangser Dr. (Prof.) G.K.Rath-i cancer tashidak indang temetettsü kar shia shisalemsatep aser Rev.Vilodi Sakhrie-i mozü ki meshiteta sarasademtsü.
Iba mozü ki yangluba maparen ajak nung yariteper aser tanü sentong nung arua adenertem ajak dang  Wb. Y.Along Aieri pelaba metetdaktsü.