Dimapur nung CBI Branch Office lapoktsü mepishir: NPRAAF

Dimapur, Monupii (May) 22 (TYO): Nagaland Public Rights Awareness and Action Forum (NPRAAF)-i Central Bureau of Investigation (CBI) dang Dimapur nung CBI Branch Office ka lapoktsü atema mepishia metetdaktsüogo.
NPRAAF-i The Joint Director, CBI North East Zone Anti Corruption Zone dangi shidi ka züluba nung NPRAAF-i küm ana dak tema Nagaland sorkar department balala nung ochimashi inyakba anema mapa inyaka arur ta shia lir.
NPRAAF ya voluntary organization ka dang asübayong ochimashi mapa putetyonga ozüng mapa meinyakteter, anungji public fund tim mesüi mamshidaktsütsü atema onoki Nagaland nung CBI office ka lapoktsü akhanger, ta shidi nungsa shia lir.
Dimapur nung Special Judge CBI court mapa inyaker anungji Dimapur nung CBI branch office ka lapoktsübaji temsüa lir. Ano, CBI nung Special Counsel ka ama inyaktsü atema local Advocate ka nüngdaker, ta NPRAAF-isa ashi.
NPRAAF-i ochimashi mapa anema inyakba nung yariteptsü aser onoki akhangba ya Nagaland nung alirtemi aginüba lir, ta parnokisa metetdaktsü.
Dimapur nung CBI office lapokba nung NPRAAF-i ali bushitsütsü aser nüngdakra office lapoktsü atema ali tenlatsü, ta parnokisa shisem.