Dimapur nung CCTV surveillance coverage tenzükogo

Dimapur, September 8 (TYO) : September 8, 2015 nü Addl. Director General of Police (L&O) Rupin Sharma, IPS den Commissioner of Police aser tanga Police ketdangsertemi Dimapur nung shishilembartem den ajurutepa senden ka agiogo.
Iba senden ya Police Commissioner indang Office nung agi aser Dimapur Chamber of Commerce & Industries, Business Association of Nagaland, East Dimapur Business Association, Nagaland Medicine Dealers Association, den tanga shishilembar telok aika aden.
Nagaland nung shishilembabaren dak sendakba tensa aser shishilembartemi khuret ajuruba onüktem lemsateptsü atema iba sensaksemba senden ya ayongzük. Item den külemi tongtipang onük ka jembibaji Dimapur nung CCTV surveillance coverage atema liasü, ta Addl.Dy.Commissioner of Police/PRO Dimapur-i sangdong ka nung metetdaktsü.
Shishilembaba aser rongsenkettsüng renloka aotsü atema security ji kanga tongtipang aser police-i shishilembaba nung shilem agirtem den külemi technology tasen adokba nungi teyari agia mapa inyaktsüla, ta Addl. Director General of Police (L&O)-i senden nung lemsatep.
Asen taküm aser temeket kümzüka ayutsübaji police indang mapa dang masü saka loktii külemi shilem agitsüla. Dimapur nung ozüng alema mapa inyakba azüoktsü atema CCTV network tajung ka alitsüla aser iba mapatong ya Police-Public partnership yimya nung inyaktsüla, ta Rupin Sharma-isa ashi.
Iba dak sendakba nung Dimapur Police-i tesem 7 nung CCTV camera 50 den timba yua lir saka itemji stand alone units dang lir. CCTV camera temji tendangtsü atema dang enok aser Police-i iba ajanga teyari anguba asadangdar, ta Addl.Dy.Commissioner of Police/PRO Dimapur-i sangdong nung shia lir.
Police-isa Dimapur District kübok shishilembartem dang pei pei dokan telung nung dang masü saka kima nunga CCTV surveillance coverage ayutsü tetuyuba agütsüogo. Tarutsü anogotem nung police-i tesem balala nung CCTV cameras enoksemtsü sentong lir aser iba ya Dimapur nung integrated CCTV surveillance network ka ayutsü nükjidong nung lir, ta sangdong nungsa shia lir.
Tanü senden nung shishilembar teloktemi CCTV mapatong pelaa agizük aser yariteptsü ta ashi aser DCCI tir, Hokivi Chishi-i ashiba agi, Police Department-i yaritepba aser tetuyuba agütsüba nung ajemdaker Hazi Park Market aser New Market nung CCTV enoktsü renemogo.
Senden nung adenertemisa iba mapatong kübok school aser college tem enoksemtsü tebilemba shidang aser iba dak sendakba nung SD Jain College, Dimapur nung CCTVs enoka aliba atishia jembi.
Iba mapatong takok ngua inyaktsü atema Business Communities aser Police nungi Luden ka shimtsü aser parnoki tongtipang tesemtem ajiteta CCTV tem enoktsü.
Tanü agiba senden nungsa Traffic, parking aser tanga onüktem benoka lemsatep aser tarutsü nunga iba ama senden ali junger ta tesentepertem bangjemtep, ta Addl.Dy.Commissioner of Police/PRO Dimapur sangdong nungsa metetdaktsü.