Dimapur nung CHSS-i ‘Clean Your Neighbourhood’ sentong ayonga agiogo

Dimapur, August 20 (TYO): Christian Higher Secondary School, Dimapur küm 50 ajungba Jubilee nüngtem nung küm piyonga agia aoba sentong ka, merükmeju sentong August 19, 2017 nü agiogo; iba sentong ya CHSS Social Service Club leniba nung agi aser Water & Sanitation Support Organisation (WSSO), PHED, Nagaland-i sponser asüba liasü.
Iba sentong nung kaketshirtem, tesayurtem, taoba mapang azüngertem, temeimertem aser team Clean Dimapur nungi nisung 1500-i Nyamo Lotha Road aser school campus merükteta among.
Iba dak alia bicycles nung awareness slogans amer jajaba den signature campaign, Essay aser Art competitions ‘Keep it Green, Keep it Clean’, ‘Our Environment, Our Responsibility’, ‘Go Green, Go Clean’ aser ‘Green Earth, Clean Earth’ onüktem nung agi.
‘Clean Your Neighbourhood’ campaign agiba ajanga CHSS-a ‘A Better Dimapur’ team nung shilem agia adenba mezüngbuba shisaliok reju kümogo.
Iba sentong nung tongti tejaoker, Dimapur Municipal Council (DMC) Administrator, Moa Sangtam-i iba school-i mera tajung agia inyakba atema tenüngsang agütsü.
Paisa kaketshirtem dang ‘pei ki kija merükba’ tangatetba melenshia pei kiyong aser jila-a merüka ayutsü tayongzüba aguja liasü.
Iba sentong dak sendakba nung Honibarnü shia CHSS Social Service Club-i Nyamo Lotha Road merüktettsü, aser Dimapur yimti temerükba akümtsü atema osangbener kaka süa tatishitsü tajung sayur senso kaka akumtsü.