Dimapur nung Community Policing nüngdaker

Dimapur, October 17 (TYO): October 16, 2019 nü PAC NCD-i Dimapur Urban Colonies Chairmen’s Federation (DUCCF), Dimapur District Village Council Chairman’s Association (DDVCCA) aser Dimapur Police Commissionarate ketdangsertem den senden ka amen.
PAC-i Dimapur nung ozüngi memelaba sen saruba anendaktsütsü atema inyakba osang lemsatepba den Community Policing nüngdak ta asüba jembitsü atema iba senden ya ayonga amen.
Police kijai loktiliba nung ozüng alema inyakba ajak mazüoktettsü, anungji parnok den yariteptsüba lenmangtem bushitsüla. Loktii shilem magi tashi, ozüng alema inyaksangshiba mazüoktettsü ta senden nung jembitep.
Senden nung Commissionarate Office nung ACP-i Dimapur nung police nübo peria maliba khuret lemsatep saka paisa ashiba agi parnoki anibelem arema tajungtiba inyaker.
Tangalenbo COPS (Community Oriented Policing Scheme) inyakyim tenzüka lir aser iba nung police aser loktiliba külemi yaritepa ozüng alema mapa inyakba noktanger, ta ACP-i ashi.
Paisa Sunset Policing aser Neighborhood Watch indang lemsatepdang, iba nung loktii tongti shilem agir saka public-i ozüng amertem ama mapabo meinyaktsüla ta tekümdangtsü olen ka ashi.
PAC-i Dimapur Urban Colonies Chairmen’s Federation (DUCCF) aser Dimapur District Village Council Chairman’s Association (DDVCCA) nungi teyari meshi aser tarutsü nung community policing inyakyim tenzüka aotsü junger ta lemsatep.
Tarutsü nung maneni iba ama sendentem ayonga amentsü aser kobi melii GBs den senden ka amentsü lir, ta PAC Convenor-i ashi.