Dimapur nung Congress membership drive tenzükogo

Dimapur, March 15, 2025 (TYO): India nung tanü Indian Constitution tamendakdak samatsütsü atema tashi aika lir aser parnoki nübortem den meputepba policies aser programmes sangdonger ta Nagaland Pradesh Congress Committee-i ashi.

Honibarnü Congress bhavan, Dimapur nung Congress membership drive tenzükba sentong nung tesüiba küm ishika secularism anema mapa inyaka arur ta NPCC working president C . Apok Jamir-i ashi. “Tesüiba küm 14 jungnüa asenok libaliro aser tamangba asoshi lendong bentsür arutsüsa policy kar indang jembia arur” ta pai ashi. “Tajung angatetteptsü, longjemtsü aser tejakleni aotsü atema sorkar kati Constitution tamendakdak anema inyakdang senso shiai masü-a ta noktaktsü tim.

Congress-isa Constitution aser nübortem taginüba kümzüka yutettsü” ta Apok-isa ashi. “Congress-i membership drive inyakba ya nübo arentsü atema masü saka sensosangertem dang tanü asenoki ajurua aliba tayongzükbatem anema noktaktsü tangatetba agütsütsü atema lir. Asen nübortem ajembanga ayuba aser tashiyim inyakba anema senso shia shilem agitsüla aser temelenshi bener arutsü atema külemi inyaktsüla” ta paisa ashi.

Apok Jamir ya Nagaland nungi taoba Rajya Sabha MP lir aser paisa ashiba agi “Congress ya nüjiso atema raradang nungi nübortem temeten atema inyakba party tejentiba lir.” Congress party ya iba linük kümtetdang aser nüjiso atema raradang nungi liasü aser tangar memenepertem taginübatem kümzüka ayutsü atema Constitution yanglu ta Apok-isa ashi.

Hinduism ya taremzük aliba tamangba yimsü ka lir aser iba yimsü ajanga temeim aser yimjung osang prokshir, saka nisung telok kati iba yimsü ya tashiyim tangatetba nung prokshir aser parnoki loktiliba nung telemsa aser tesempatep adoktsü atema inyaker, ta paisa Hindutva agencies indang olen ka ashi.

Iba atema asenok külemi tangatetba ka ser noktaktsü nüngdaker. Nagaland nung mesüra linük kübok tangalen loktiliba nung telemsa aser tesempatep madoktsü atema asenoki inyaktsüla ta Apok Jamirisa ashi. “Policy tem mapa akümtsü aser temelenshi bener arutsü atema nübortem tashi nüngdaker. Nagaland nung alirtemi parliamentary elections nung nübortemi shimtetba nübo ta takok ngudakja sayuogo.

Congress-i nübortem asoshi noktaker aser MP-i Nagaland nung temelenshi bener arutsü atema anibelem arema inyaka arudar” ta paisa metetdaktsü. Dimapur district atema membership drive ya March 22, 2025 tashi asütsü aser iba sülen tanga district tem nunga agitsü.