Dimapur nung Consumer Awareness Programme ka agi

Dimapur, July 3 (TYO): Department of Legal Metrology & Consumer Protection-i Dimapur District Legal Services Authority (DDLSA) den yaritepa Consumer Awareness Programme ka ayonga agiogo.
July 3, 2019 nü Nousi Auditorium, Niathu Resort nung iba sentong agi.
Legal Metrology & Consumer Protection, Food & Civil Supplies and NSDMA Advisor Pukhayi Sumi-i o jembidang “nisung shia ya tasodang nungi consumer ka lir aser awareness programme agiba ya consumer aser shishilembar tsüngda tesentaktep metettsü atema lir” ta ashi.
“Naga shishilembartemi khen nung takar akümtsü tangatetba lir, anungji shishilembartemi talir nem quality products agütsütsüla. Shirang aika anepalutsü atema tangaleni yokba ya quality products tajung maliba den sendaktepa lir. Asenoki state ajungalen Consumer Awareness Programme ya agia osang tejangja sangoktsütsü nüngdaker” ta Pukhayi Sumi-isa ashi.
“Legal Metrology & Consumer Protection Department-i consumer tem indang temeten kümzüka ayutsü atema inyaker. State Commission aser District Forum-i consumer atema latetba ozüng aser teinyaktsü aika mapa küma inyakdar aser March 31, 2010 tashi nung State Commission-i consumer ken o 150 aser District Forum-i ken o 635 angadangogo. Department-ia weighing aser measuring instruments 13500 tashi reprangogo” ta paisa shisem.
Chief Judicial Magistrate, Dimapur & Dimapur District Legal Services Authority Secretary, Ajongba Imchen-i okila jembidang “ochimashi agientsü atema nübortem ket nung hadir tulutiba lir aser itemji Lokayukta, RTI Act 2005 aser Consumer Protection Act 1986 lir aser lir” ta ashi.
Alima nung constitution tajungtiba yanglubaji Indian constitution lir aser iba ajanga linük nung senso shia nem kasa maongka agütsür. Arrla 371A nung Naga nunger atema balaka lateta lir, aser iba ya Naga nunger asoshi sempet ama lir. Ajisüaka, asenok nem maongka talila agüja liaka, asenoki sector aika nung tanga state tem memenep, ta Ajongba Imchen-isa ashi.
Küm tenem dak tema lir sülen ang ochimashi anema Lokpal bill yangluba linük ka nung asenok alir. Anungji asenoki asen temetentem meteta alitsü tim. Department aser reju ajak nung teinyaktsütem lateta lir aser ketdangsertem aser yimsüsürtemi constitution tashi angatsüla, ta paisa shisem.
Nagaland nung alirtemi pei temetentem meteta alitsüla aser tim ketdangpurtem dang nungi teyari meshitsüla. Dimapur District Legal Services Authority-i temelenshi bener arutsü atema tenangzüka agir mapa inyaker aser Legal advices nüngdakertem angati agi yaria arur aser maneni yaritsü, ta Ajongba-isa ashi.
Sentong nung EAC Chumukedima Thejavizo Nakhro aser Dimapur Champer of Commerce & Industries President natia o tatsütsü jembi.
Tanü agiba sentong nung Police Baptist Church, Chumukedima Pastor Rev. Manen-i temoatsü meshia sarasadem, Dreamz Unlimited-i Consumer Rights jilushi ka ai aser Nagaland Conservatory of Music nungi Vini Assumi o Welly Baruah nati ken ka aten.