Dimapur nung COVID-19 atema senden amen

Dimapur, April 9 (TYO): Hokolbarnü Dimapur Deputy Commissioner aser Dimapur District Task Force chairman Rajesh Soundararajan-i senden ka ayonga menogo.
Senden nung Dimapur District Task Force for COVID 19 aser District Task Force for COVID 19 vaccination züngsemtem aden.
Nagaland nung nisung aika dak Covid aliba puteter aser anungji Dimapur district nung Covid 19 wara tanabuba anema renema alitsüla, ta Dimapur DC-i ashi.
Dimapur Airport nung tarur ajak dang Covid 19 tendangtsü anungji senzüsenbongertemi negative Covid-19 test report bener arutsüla, ta Rajesh Soundararajan-isa metetdaktsüogo.
Sorkari tuyuba ama tesem mashi nung COVID 19 tendangtsü, ta paisa shisem.
Senden nung Dimapur CMO, Dr. Mereninla-i o jembidang “public-i Covid-19 atema kanga zübazülema bilemer anungji züngsemtemi Medical department den yaritepa ba osang prokshiba nung yariteptsü mepishir” ta ashi.
Külem, District Immunization officer, Dr. Rebecca-ia Dimapur nung Covid 19 vaccine agütsüba osang metetdaktsü.
Dimapur nung arishi küm 45 ser temapur nisung 50 aser timba aliba office tem nung vaccine session centers lapoktsü indang jembidang Dimapur DC-i office aika nung nisung 50 tema malitsü akok anungji office tem lokteptsü atema mepishia metetdaktsü.
Dimapur nung Chairman & GB unions lennirtemia DTF dang ward wise vaccination drive agitsü mepishi aser ibaji medical department-i agizük.