Dimapur nung COVID-19 osang metetpelatep

Dimapur, March 27 (TYO): Public Health Engineering Minister, Jacob Zhimomi-i Hokolbarnü Dimapur district nung COVID-19 atema mapa inyakbatem reprangshimtsü atema senden ka ayonga amen.
Sendenji Dimapur DC indang conference hall nung amen aser Advisor Zhaleo Rio aser Advisor Tovihoto na aden.
“Iba tongtipang mapang nung sub division balala nung mapa lemzüka aliba doctor temi tesem toktsür maotsü mepshir. Maneni, sub-divisional officers-ia COVID 19 anema mapa inyakba nung Village council tem den amalitepa inyaktsü atema pei lemzükba tesem toktsür maotsüla” ta Minister Jacob-i tanü senden nung ashi.
Paisa Village council züngsemtem aser lanurtem dang mask enoktsü aser nisung den tepila ayutsü ashi.
Paisa, medical department dang parnok nüngdakbatem Dimapur Deputy Commissioner ajanga tezüluba nung sorkar dangi abentsü metetdaktsü.
Jacob-isa Legal Metrology aser DMC sendakteper public ajangzüktsü atema kechisarena nung jenjang atuba azüoktsü tetuyuba agütsü.
Senden nung Sericulture, Excise and Tribal Affairs Advisor, Zhaleo Rio-ia o jembidang “iba mapa mapang ka nung State sorkar aser Private Agencies, NGOs, Village Council, lanurtemi mapa tajungba inyakba atema tenüngsang agütsür” ta ashi.
“Nagaland nung tang tashi COVID-19 aketer ka dang maliba atema Tsüngrem tenüng asanger, saka asenok zübazülema malitsüla. Dimapur nung mapa tajung inyakdar aser maneni tajungba inyaktsü merangtsüla. Dokan kiburtemi jenjang tur mayoktsüla” ta Zhaleo Rio-isa ashi.
Power Advisor, Tovihoto-ia district administration, police, Medical department aser tangartemi Dimapur nung COVID-19 anema mapa tajung inyakba atema pelaba metetdaktsü.
Paisa, Deputy Commissioner dang tongtipang nüngdakbatem aser medical equipments jenjang metudaktsütsü atema tenük yoka reprangshimtsü tetuyuba agütsü.
Dimapur Deputy Commissioner-i district nung COVID-19 azüoktsü atema mapa inyakba osang metetdaktsü.
“Tang tashi nung nisung 60 tashi quarantine nung lir aser parnok district administration-i reprangdar. Maneni, ambulance tem sota lir aser COVID-19 atema ambulance 10 tashi lemzükja lir. Rongdak nüngdak adokra Chumukedima nung DC office tasenba COVID-19 hospital ama amshitsü” ta DC Anoop-isa ashi.
Dimapur Commissioner of Police, Rothihu Tetseo IPS-ia Dimapur tensa nung ajemdaker, “state sorkari dang mulungra district ajunga shibangtsü aser Essential Commodity Task Force ka tentet junger” ta tebilemba ka lemsatep.
Dimapur Chief Medical Officer, Pangjung Sangtam-ia Dimapur district nung parnoki mapa inyakba osang metetdaktsü.
“Dimapur district nung isolation yipden 96 tashi shima lir aser ventilators adenba yipden 8 tashi renema lir. Sorkar aser nija indang ambulance 18 tashi sota lir aser driver tem nem training agütsüogo aser parnok mobile number bendena lir” ta CMO, Pangjung-i ashi.
Dimapur Municipal Council Administrator, Albert Ezung-ia DMC-i mapa inyakba osang lemsatep.
DMC-i colony aser shishilembadak ajak senteper tesem 96 merükmejuogo aser anogoshia merüker, ta Albert-i ashi.
“Yashi nungi tesem balala mozü agi merüktetba mapa tenzükogo. Iba asoshi sanitation workers atema tebilemtsü lir” ta paisa shisem.
Idangji senden nung adenertemi medical department dang sanitation workers yaritsü ashi.