Dimapur nung December Fest tenzükogo

Dimapur, Luchii (December) 19 (TYO): Nübortem tsüngda tesentaktep akangshitsü aser tajungba akümtsü nükjidong nung Bodbar nungi December Fest tenzükogo.
DDSC stadium nung ayonga amunga benjung nung tanü GOC 3 Corps, Lt. Gen. Gopal R (AVSM, SM)-i tongti tesemdanger ama shilem agi.
Iba benjung ya The Better Dimapur-i Dimapur Municipal Council (DMC), Naga Council Dimapur, GB Union Dimapur, Dimapur Urban Council Chairman Federation aser Naga Women Hoho Dimapur teloktem den yaritepa ayonger.
Sentong nung adentsüpurtem sentepba ngua GOC Lt. Gen. Gopal R-i kanga pelaba metetdaktsü aser benjung ayongertem nem tenüngsang agütsü.
Iba benjung ya Hornbill festival ama küm shia ayonga amungba benjung ka asütsü imlar, ta pai ashi.
Dimapur merüktettsü aser topur junga talidak tajung ka kümdaktsütsübaji volunteer telok kati dang masü saka ajaki shilem agitsü atema tenangzükba agitsüla, ta Lt. Gen. Gopal-isa ayongzük.
Benjung mongpu amungba mapang nisung ajaki 2019 January nungibo Dimapur ya sentilung ka ama kümdaktsütsü atema shilem agitsü tenangzükba agiang ta paisa mepishia ashi.
Dimapur tali temerükba aser tajungba akümtsü atema army cantonment-ia akokba tashi yariteptsü mulunga lir, ta paisa shisem.
December Fest nung lisopur asaya aser saisapongtem, kentenbaren, colony balala tsüngda tetoktepbatem aser ano sentong aika agitsü.