Dimapur nung District Task Force senden amen

Dimapur, September 26 (TYO): Mission Indradhanush programme round 1 koba October 7 nungi 14 2017 tashi akatsüba ali, iba sentong ya tali tashi itshidaktsütsü nükjidong nung September 26 2017 nü Dimapur DC conference hall nung District Task Force Committee senden ka kaogo.
Senden nung Universal Immunization Programme dak sendakba nung power point presentation agütsüba mapang District Programme Officer (UIP/RCH), Dr. Lanuakum-i ashiba agi, UIP ya India nung public health programme tulutiba lir, aser iba sentong ajanga küm shia mashisa aliba tetsür million 30 aser kinü tanur million 26 dak rangloker inyaker.
Iba telok nem antigent ti tashi agütsür. BCG, DPT, OPV, IPV, Hepatitis B, Tetanus aser pentavalent vaccine aketba Hib, Antigent tem ya linük ajak nung agütsür aser measles-Rubella, Rotavirus, PCV & JE tem ya state aser district teshimtet kar nung agütsür.
Paisa ashiba agi, Intensified Mission Indradhanush indang nükjidongji December 2018 tashi nungbo district aser yimti shimteta aliba tem nung shilem 90 tashi immunization asütsüba lir.
Maneni pai ashiba agi, iba sentong indang nükjidongji tanur küm ana tashi aser mashisa aliba tetsürtem routine vaccination magiteti alirtem atema lir. Ajisüaka tanur küm 5 tashia vaccination asütsüba menokdangtsüla, ta shisem.
Lanuakümi ashiba agi, IMI mezüngbuba round October 7 nungi tenzüka anogo tenet tashi agitsü aser iba nung Deobarnü aser holidays aser RI anogotem mezüngoktsü aser kasa sentong ya ita asem tashi maneni inyakyonga aotsü.
Ajak senteper tanur arishi küm 0-2 tashi nung alir parnok 1580 aser tetsür mashisa alir 398, session 124 nung IMI tesem 55 nung vaccination sütsütsü asoshi nükjidong lir.
Iba senden nung district programme Officer-i züngsem ajak aser stakeholder tem dang iba sentong takok ngua inyaka aotsü atema nüburtem nem shisatsü agütsüba nung teyari agütsütsü asoshi ajungshi.
Project Officer, UNDP, Imlibaia eVIN dak sendakba nung powerpoint presentation agüja liasü. Iba senden ya SDO Sadar, Zakabo V Rotokha lenisüba kübok aka.