Dimapur nung DUCCF & GBs telongjemi Clean Election atema inyaktsü

Dimapur, June 08 (TYO): Dimapur nung taruba election nungibo nisung ajaki election nung timi shilem agitsü asoshi tangatetba agüja inyaktsü atema Dimapur Urban Council Chairmen Federation (DUCCF) & GB Union Dimapur (Sadar) nati telemtetba takang ka agiogo.
Iba telemtetba ya taoba May ita 19 nü telongjem senden ka Lotha Hoho kidang lia lemtet aser ibaji mapa küma aotsü atema tang June ita nungsa tesem ajaklen shilem agitsü purtem telok tentetdaktsütsü asoshi sentong tenzüka inyakdagi.
Nagaland nung ochimashi mapatem ajunga ya election timi magiba ajanga adoker, anungji iba temenen mapatem ya nokdangtsü asoshi sensosangertem rongnung tenangzükba takang agia inyaktsü, ta parnoki sangdongba osang ka nung metetdaktsü.
Dimapur nung ya kodangsa election agidir, tangalen nungi arua tangar tenüng nung tashiyim agi vote agütsür aser telidak purtemia pei vote sen yong ayoker aser sen meshir proxy vote enoktsür, item jagi election temer pei lima renloktsüba indangbo khenyongi mebilemer, iba jagi asen lima merenlokteti tim atemer ta parnokisa ashi.
Item ochimashi aser tim masüba mapatem ajak mepu aser kiyong shia nung koktettsü asoshi June ita nung yasa mepu aser kiyong shia Core Group tentettsü aser iba telok nung Arogo lenirtem, lanurtem aser tetsürtem dena shimtsü ta parnokisa metetdaktsü.
Election timi agitsüba mapa ya Nagaland Baptist Church Council (NBCC)-i anir inyaker asünungji asenok Arogo nunger shiai iba tongpang nung shilem agitsü nüngdaker, anungji nisung shiai pei alidak iba Clean Election atema inyakba mapa nung shilem agitsüla, ta parnokisa ashi.
Core Group nung ya züngsem 50 shi alitsü aser parnoki pei mepu aser kiyong nung election timi agitsü asoshi tang nungi nübortem nem tangatetba agüja atatsü aser election dak aketba maparen ajak tipdema ochishia bener aotsü atema inyaktsü, ta parnokisa metetdaktsü.
Parnokisa election nung ochishia shilem agitsü nangzükertem asoshi Sticker tapu ka yanglutsü aser ibaji pei ki kishi nung maloka ayutsü ta DUCCF aser GBs telongjem nati metetdaktsüogo.
Iba Clean Election sentong ajanga senso shiai tenangzükba agitsübaji, Ni tesem ka dak alaka tanga nung kü tenüng mezülutsü, Ni nisung shia vote kaka dang agütsütsüba tangatetba nung nokdaktsü, Ni vote mayoktsü aser malitsü, Ni proxy vote magütsütsü, tashiyim mapa meinyaktsü aser election mapang yi majemtsü, ta nangzüktsü.