Dimapur nung Emporium skill training lapokogo

Labour & Employment, Skill Deveopment, CAWD Advisor, Kazheto Kinimi-i Nagarjan, Dimapur nung Sangtennü Emporium Skill training centre lapoktsür tangokba noksa nung angur.

Dimapur, Aami 05 (TYO): Pradhan Mantri Kaushal Vikas Yojana (PMKVY) scheme kübok Nagaland asoshi mezüngbuba Emporium skill training Sangtennü Nagarjan, Dimapur nung Labour & Employment, Skill Development aser CAWD Advisor, Kazheto Kinimi-i lapoktsüogo.
Kolkata nung amenloker aliba Emporium Trainung & Consultancy Pvt. Ltd ya Nagaland state asoshi vocational training partner ka lir.
PMKVY ya Ministry of Skill Development & Entrepreneurship (MSDE) indang flagship scheme ka lir aser iba skill certification sentong indang nükjidong ya India nunger lanurtem industry den kasa skill training agitsü aser iba ajanga taküm tajungba nung liyonga aotsü lir.
Iba skill training lapoktsüba sentong nung jembidang, state nung mapa meinyaker lanur 70,000 register süa lir, ta ashi.
State nung mapa angutsü teimla ajema akümba ajanga Chief Minister Neiphieu Rio lennisüba kübok PDA sorkari lanurtem nem skill training agütsütsü aser self employment atema yaritsü mulunga lir, ta Advisor-i ashi.
Paisa iba sentong nung jembidang asen lokti nung lanurtem tesem ajaklen renlokdaktsütsü asoshi PDA sorkar indang nükla nung akhanga nokdaktsü ajungshi.
Maneni pai Emporium Consultancy ketdangsertem dang state sorkar indang nükla takok ngua amshitsü ajungshi.
Paisa lanurtem jenjang tajungba nung ajungkettsü asoshi sorkar sentong ajak nung yaritettsü, ta ashi.
Iba scheme kübok 2020 tashinung state nung lanur 33,000 skill training trade balala nung angazükdaktsütsü ta Commissioner & Secretary, Anenla T Sato-i ashi aser training partner dang Nagaland nungi lanurtem ajangzüktsü mechi trade tali inoksemtsü ajungshi.
Iba training ya angadi lir aser PMKVY scheme kübok Labour & Employment, Skill Development department, Nagaland ajanga sponsor asü, ta Emporium Consultancy nungi Mukherjee-i ashi.
Iba training ya ita asem atema alitsü aser yangji anogo 85 alitsü. Iba training ya 10+2 nungi temapuri agitettsü aser candidate tem profile nung ajemdaker tapet trade agütsütsü.