Dimapur nung Flower Show 2020 tenzükogo

Dimapur, Metsüremi/March 12 (TYO): Dimapur District Floricultural Association (DDFA) ajanga “To earth with love” omen nung ajemdaker anogo asem Flower Show 2020 sentong ka Dimapur Club nung March 12, 2020 nü tenzükogo, kong Rural Development Minister, Metsubo Jamir tetushi tejaoker ama iba sentong moatsü.
Naro metsüba ajungkettsü aser lanur entrepreneur tem state nung floriculture wadang nung ajemoktsü asoshi ajungmesotsü nükjidong nung iba sentong ya ayongzük, ta DDFA tir Abeny Ezung-i ashi.
Minister-i iba sentong semzüktsüba mapang ashiba agi, Nagaland nung süngdong-lidong aser arem shiruru tabu balala lir aser naro tabu 300 dak tali bushiteta lir. Pai state nung entrepreneur tem dang tanga tesemtem nungi belener arutsü melen state nung anguba item narotem amshitsü ajungshitsü. Tanga len nungi bener aruba narotem dang nungibo asen state nung adokba naro tangalen bener oa ayokba nung yajangzük taliba asütsü aser naro atema Nagaland ya market tajung lir, ta Metsubo Jamai-i ashi.
Pai ashiba agi, state nung naro metsür aika lir saka nursery peria mali, koba naro anepalutsü asoshi kanga tongtibang lir. Naro indang business tajungba kümdaktsütsü mechi pai iba sentong ayonger dang nursery amshirtem inoktsü ajungshia liasü.
Paisa DDFA dang teburtem densema naro meimertem iba lokti nung dendaktsütsü ajungshi aser züngsem timba akümba ajanga dang market tuluba akümtsü, ta ashi.
Iba sentong nung spot floral arrangement tetoktepba aser exhibition dena lir aser telemsa balala nung takok angur nem senpet agütsür.