Dimapur nung ‘Gandhi Shilp Bazar’ tenzükogo

Mongulbarnü Urban Haat, Dimapur nung tongti tesemdanger Bendangtoshi Longkumer-i Gandhi Shilp Bazar lapoktsüdang agiba noksa angur.

Dimapur, March 29 (TYO) : Mongulbarnü Officer on Special Duty (OSD) to the Govt of Nagaland, Industries & Commerce department, Kohima, Bendangtoshi Longkumer-i Urban Haat, Dimapur nung ‘Gandhi Shilp Bazar’ lapoktsü.

Anogo 10 nü Bazar ya Nagaland Handloom and Handicrafts Development Corporation Limited (NHHDCL)-i ayongzüker aser Development Commissioner (Handicrafts), Ministry of Textiles, Govt of India ajanga teyari agütsür.

Tongti tesemdanger o jembidang Bendangtoshi-i Development Commissioner (Handicrafts), Ministry of Textiles-i Gandhi Shilp bazaar nem teyari agütsüba atema pelaba metetdaktsü.

Iba bazaar ajanga tesem balala nungi tayoker aser talirtem adenshia handicraft teka agi yangluba osettem ajungkettsü atema tebilembatem lemsateptsü sabang lapoktsür, ta paisa ashi.

Sentong nung Managing Director, NHHDC, Er. Temsulong Jamir-ia o tatsüka jembidang, iba sentong ajanga teka agi yangluba osettsüsettem domestic aser overseas market nung shishilembatsü atema tesentaktep yanglutettsü, ta ashi.

‘Gandhi Shilp Bazar’ lapokba sentong nung NHHDCL nungi aser tanga ketdangsertem aika aden. Iba bazaar nung linük tesem balala nungi teka mapa inyaker parnok 100 den teimba arua shilem agir.