Dimapur nung GMS, Zeliangrong Golden Jubilee mongogo

 November 11, 2017 nü Government Middle School, Zeliangrong village küm 50 ajungba Golden Jubilee sentong nung tongti tesemdanger, Urban Development Advisor, SI Jamir-i Jubilee Souvenir sayatsüdang tangokba noksa nung angur. (Dimapur, November 11, 2017)

Dimapur, November 11 (TYO): Dimapur nung Government Middle School, Zeliangrong village-i “Imparting knowledge, changing lives” omen nung ajemdaker küm 50 ajungba Golden Jubilee Honibarnü mongogo, aser iba sentong nung tongti tesemdangerji, Urban Development Advisor, SI Jamir liasü.
LIangmeijei Paul Rongmei-i acha ayanga iba school ya nija English medium school ka ama 1960 küm amenoka liasü, aser tesülen 1967 küm sorkari iba school agizüka Govt. Primary School ta aja, aser tangbo Government Middle School Zeliangrong ta upgrade süogo.
Jubilee sentong nung jembidang S.I Jamir-i, school-i iba alizüng tongtetba atema school ketdangsertem aser Zeliangrong village nem tenüngsang agütsüba den külemi ‘iba school-i ano temaba jenjang tongtettsü atema maneni inyaktsü imlar’ ta lemsatep.
Iba school ya Dimapur yimti tiyongtsülen lir, aser ano iba school ya temaba jenjang kati ajungkettsüsa tanurtem enrollment agi temsüa lir.
Iba school kanga renlokogo, ajisüaka ano teinyaktsü aika lir, ta shia tongti tesemdangeri yim lenirtem dang school jenjang renloktsü atema maneni nungitba den amalitepa inyaktsü ajungshia liasü.
Paisa, tarutsü nung iba school ya full fledged higher secondary school ka akumtsü imlar, aser iba atemaji inyaktsü pai melunga lir, ta ashiba den külemi yim lenirtem aser school kedangsertem danga iba dak sendakba maparen inyaktsü ajungshi.
Tanep tongti tesemdangeri Jubilee nüngshilong sayatsü aser Jubilee souvenir-a sayaja liasü. Sentong nung Head Teacher, Tianaro-i salem osang aben aser Souvenir Committee Convenor, Aphien Gonmei-i iba school indang tongmelang agi metetdaktsü.
Tanü anogo nungsa Town Government Middle School, Nagarjan küm 75 ajungba Platinum Jubilee sentong nung SI Jamir tongti tesemdanger ama dena liasü.