Dimapur nung guitar tajung yanglur

Dimapur, May 22 (TYO) : Naga nunger kongki tema ken atentsü jangrartem asoshi osang tajung kaji Dimapur nung Aor lanur kati guitar kanga junga yanglur aser pai yangluba guitar-ji aginür aika kümogo.
Iba osang angashia tanü iba osangbeneri pa mapa inyakdak tonga oa pa mapaji reprangdanga sensaksemdang, ‘tamasabo tayoktsü bilema masü saka yanglutsü jangraba agi guitar yanglutsü tenzük, saka tangbo nisungtemi asüngdangba agi yanglur meyanglupur,” ta guitar yanglusang sangpang Temsükaba T Ao-i metetdaktsü.
Pa ya Longsa nunger aser Dimapur nung Kivijau Colony nung par tsüraburtem den külemi alir. Pa BA graduate asüba nisung ka lir aser pa tejangraba ajunga agi Nagaland nung guitar tajungtiba yangludak tajung ka lapokner.
Pai acoustic guitar, Electric guitar aser süngzü pezü aketba guitar tila Ukulele nungertem yanglur. Ano, nisungtem asoshi anisüngzük kaji pai guitar tejentema tasen küma yanglushitsür.
Pa guitar yanglutsüba ya kodang aser kong angazük ta asüngdang dang, kecha balaka training agir metenzük saka angazüktsü jangraba agi Dimapur nungsa mezüng guitar yanglu tenzüksang Wb.Yanger Aier den ita asem training agi aser iba denji internet nung YouTube nungi agizüka itemji yur ajizüka yanglua tenzük. ta Temsukabaisa ashi.
Pai yangluba kongkitem nem pai tenüng agütsübaji ‘tms’ Guitar ta tenüng agüja lir. Pai guitar yanglutsüba ya 2014 küm tenzük aser tang tashi nung pai acoustic guitar 20, electric guitar 2 yangluogo. Itemji koma ayok ta asüngdangdang, Dimapur nung kongki ayoker nüngtugu dokan Cresendo aser Anchor Music Store-tem ajanga ayok ta pai ashi.
“Ano kongki tasen aika yangluner kechiyong taginer lir saka ano tejen yanglushitsü bener aruba meyanglumaba agi tasen meyanglutetter,” ta tms Guitar kibur Temsübaisa ashi.
Pa guitar yangluba osettemji kong nungi bener arur ta asüngdang dang, guitar yanglutsüba süng ya Dimapur nung süng tajung angur, anungji itemji bushia alir saka yin nungertem yabo China nung yanglubatem Alibaba telok nungi online ajanga alir ta paisa metetdaktsü. “Asen lima nung ayokba oset ya teimbaka China nung yanglubatem lir, aser itemji jenjang dalang agia angur saka jenjang dalang apia alidang osetji tamajung asür,” ta paisa ashi.
Pai yangluba guitar-temji sen kwi agisa ayoker ta asüngdangdang, tang tashi nung yangluba acoustic aser electric guitar-ji ka nung sen meyirijang pongo shi agi ayoker aser Ukulele jibo sen meyirijang ana shi dang lir ta pai shia liasü.
Tang tashi nung pa mapa tenzüktsü asoshi government nungi teyari kecha agia mali saka teyari angutsüsa lenmang angu nungbo pai ano tang dang nungi tajungba yanglula ta Temsübai tejangraba ka shisem.
Tang pa ket nung guitar kolaklen teki apaba machine ka aser rong atepba machine ka ta lir. Teki apaba machine-ji India nung yangluba machine lir aser sen jenjang meyirijang ter pezü liasü saka rong atepba machine yabo tebui yanglutsüba machine lir ta par tsürabur dang pelaba o ka pai shisem.
Guitar yangluba training ya India nungbo mangur saka UK amala nung dang lir, anungji khenbo oagi anogo ishika danga monga angazükner ta pai tejangraba ka shia liasü. Pa ya küm 26 tain lanur ka lir aser pa den tongtepratepnüra mobile phone number; 8974753025 aser email temsukaba.lkr@gmail.com ajanga jembitettsü.