Dimapur nung injang khaloktsüba aitsür

Dimapur, June 7 (TYO): Brihostibar aonung 9:30 ako meta Dimapur kübok Darogapathar nung mejangjatetba nisung kari MLA Sharingain Longkumer’er kidang injang khaloktsü.
National Highway tsütsü nungi mejangjatetba nisung kari gate nung injang khaloktsür jena ao, ta Dimapur Police, PRO, T Relo Aye-i ashi.
Iba lendong atalokdang MLA Sharingain aser par kibong kidang maliasü. Iba tesem nungi AK 47 injang terep 10 ngutetogo, ta paisa ashi.
Iba tatalokba dak sendakba nung nisung shinga mapu aser bushisüngdang südar, ta Aye-isa shisem.
June 5 aonunga Sovima yimtsüng nung mejangjatetba nisung kari NDPP secretary general Abu Mehta’er kidang injang khalokja liasü.
Nationalist Democratic Progressive Party (NDPP) Secretary General, Abu Metha aser NDPP MLA Sharingain Longkumer’er kidang injang khaloktsüba aitsür ta Nagaland Governor PB Acharya-i tanü sangdong ka nung metetdaktsü.
Iba ama mapa inyakba ya kanga tim masü aser state sorkar ketdangsertemi tekaratiba nung aibelenertem pua ozüng tapet agi merenshitsü imlar, ta pai ashi.
Nagaland nung alirtemi yimjung aginür anungji nisung shingaia tensa raksatsüsa mapa meinyaktsü ayongzüker, ta Governor Acharya-isa metetdaktsü.
June 7, 2019 nü Kohima nung People’s Democratic Alliance (PDA) coordination committee rongdak senden ka amendang Sovima Dimapur nung injang khaloktsüba onük benoka lemsatep aser iba tatalokba aitsü.
PDA züngsem aser NDPP Secretary General Abu Metha’er kidang injang khaloktsüba aitsür. Pa ya Advisor to the Chief Minister of Nagaland lir. State nung alirtemi iba ama mapa meinyaktsü mepishir aser ozüng amertemi aibelenertem tangsa pur tapet temerenshi agütsütsü akhanger, ta PDA member aser General Secretary BJP Nagaland K. James Vizo-i sangdong ka nung ashi.
Naga People’s Front (NPF)-ia sangdong ka nung NDPP Secretary General, Abu Metha aser MLA Sharingain Longkumer na kidang injang khaloktsüba aitsür ta metetdaktsü.
Iba ama lapi mapa ya magizüker aser state sorkar den bushisüngdangertemi iba tatalokb bushisüngdangtsü aser aibelenertem aputsü akhanger, Press Bureau sangdong ka nung ashi.
June, 6, 2019 aonung Public Relation Officer (PRO) to the Chief Minister of Nagaland Rusemtong Longkumer’er kidang injang khaloktsüba atema kanga aoksar, ta Darogapathar Village Council-i metetdaktsü.
Iba ya nisung tepsettsü merangba inyakyim ka lir aser ozü yimtsüng nung alir dak iba ama mapa inyakba khukhua aitsür, ta DVC-i ashi.
Darogapathar Village telongtet nung iba ama lapi aser tamashi mapa meinyaktsü mepishir. Ozüng amertemi iba tatalokba atema bushisüngdangtsü aser aibenertem pua tapet temerenshi agütsütsü ayongzüker, ta DVC mendenpurtemi ashi.
Angami Public Organisation (APO)-ia sangdong ka nung Sovima Village nung Abu Metha aser Zeneituo Yano na ki amakba aitsür ta metetdaktsü.
Arogotem, Naga Civil Societies, NGOs aser kijatemi yimjung bener arutsü atema inyakba mapang ka nung iba ama tesempatsü mapa inyakba aitsür. Prangpong amshiba sobaliba ajanga kecha matongtsü ta asenoki meteta lir. Anungji Naga nungertemi iba inyakyim toktsütsüla ta APO-i ashi.
Sorkar aser ozüng amertemi iba tatalokba jungjunga bushisüngdangtsü aser aibelenertem pua merenshitsü ayongzükr, ta APO-isa metetdaktsü.