Dimapur nung Intl. Day against Drug Abuse anogo among

June 26, 2019 nü Don Bosco School Campus, Dimapur nung International Day against Drug Abuse & Illicit Trafficking anogomong sentong agidang tangokba noksa nung angur. Telung noksa nung CJM/Secretary DDLSA, Ajongba Imchen-i okila jembiba noksa nung angur.

Dimapur, June 26 (TYO): June 26 nü Don Bosco School Campus, Dimapur nung ‘Listen First-Listening to women & children is the first step to help them’ omen nung International Day against Drug Abuse & Illicit Trafficking sentong agiogo.
Iba sentong ya Miqlat Ministry, DAPCU aser Prodigals’ Home-i DDLSA aser NNAGA-DAO Dimapur den senteper ayongzükba liasü.
Okila jembidang CJM/Secretary DDLSA, Ajongba Imchen-i, temesepba mozü achirtem aser shibelena ayokertem nem awareness junga agütsütsüji asenok teinyaktsü mapa lir, ta metetdaktsü.
Paisa, “Tetsütem aser lanurtem aikati mapa meranga inyaker, ajisüaka ano aikati azümesena sen melamela aazüktsü atema ozüng alema inyaker, anungji parnok nem awareness agütsütsüla,” ta ashi.
“All India Legal Services-i mozü tim mesüi achiba aser shibelenba anema raratsü bangjemba den külemi awareness junga agütsütsü bangjemogo,” ta paisa ashi.
“Melungtet teloktem, agency balala aser ketdangsertem ajaki longjemer iba tebilemtsü atema inyaktsüla,” ta paisa ayongzük.
O lemtepba sentong nung shilem agir ACP (D), Dr. Tiamenla Phom-i, “Temesepba mozü ayoker tetsürtemi ‘temesepba chiyungtsütem shibelena ayokbaji ozüng alema lir ta memeteti liasü’ ta ashir, anungji parnok nem awareness agütsütsüla,” ta ashi.
Laisa, “Tsüraburtemi yi ajemba mesüra mozü achiba ajanga kibong nung tanurtem aika kongshir, ano tetsü aser tebu naprong machi-majemtsü chiajemba kanga bulur, aser item ama kibong nungi tanur samaba kanga buludar,” ta metetdaktsü.
Panel Lawyer DDLSA, Yanbemo Ngullie-i, NLSSA-i mozü achiba aser shilbelena ayokba anema legal services agüja arudar, kechiyong iba ya ajanga tanurtem aser tainlonglongtem kanga kongshidar, ta ashi.
Parnok nem awareness agütsütsü melen aiben asenoki parnok sensamasatsür, ta pai ashi.
“Mozü achir tetsürtemi mozü achitsü atema pei mang ayoker, anungji asenoki parnok nem mozü achiba ajanga takoksa balala anguba indang angatetdaktsütsüla,” ta paisa shisem.
Miqlat Ministry Director, Asha Sanchu-i, HIV/AIDs agi shirangertem nem ART treatment indang awareness agütsütsüla; asenoki item onük dak sendakba maongka aser tayongzükba balala rajema inyaktsü nüngdaker, ta ashi.
“Yi aser temesepba mozü anema dang masü saka asenoki asen loktiliba ajungkettsütsü atema mangdang tuluba yur inyaktsü nüngdaker,” ta laisa ayongzük.
Prodigals’ Home Director, K Ella-i, yi aser temesepba mozü tebilemtsü koktettsüsa asenok Welfare dept., Education dept., police dept., melungtet teloktem, Arogo aser lokti tentet aika lir, anungji ajaki temelenshi adoktsü atema inyaktsüla, ta ashi.
Yi jemertem aser mozü achirtem sensamasatsüba anentsüla, saka parnok atema nai langka tajung inyaktsüla, nai kecha meinyaktetra ola madoktsüla, ta lai ashi.
“Yi jemertem aser mozü achirtem rehabilitation centre nung item chiajem indoker pei kidangi aoba sülen maneni tanaben chiajem tenzüker, aser iba ya loktii parnok menungitba ajanga lir, anungji asenoki parnok nungittsü nüngdaker,” ta laisa ashi.
Tanü iba sentong ya NETSU Programmee Officer, Anna Hairang leniba nung agi, Prodigals’ Home Asst. Director, Maong Jamir-i anküp jembi aser DBIDL, Fr. CT Varghese-i sarasadema sentong tembang.