Dimapur nung IR jawan kati nisung ka khaset; ka yirutsü

Dimapur, August 23 (TYO) : Honibar aonung 10:30 ako meta Rail bazaar, Dimapur nung IRB patrol duty telok ka nung section commander-i auto rickshaw ka nung injang khaloktsüdang nisung ka khaset aser ka yirutsü.
Iba lendong nung tasüsangji Deepak Dey’er jabaso Dipanker Dey (22) liasü ta jangjaogo aser pa ya Kuda village, Dimapur nung telidak liasü.
Asür Dipanker’er medemer ana Jorhat nungi Honibarnep Dimapur-i aru aser par asem auto rickshaw ka nung mener lia IRB sepai jagi injang khaloktsü. Tia kaa iba tatalokba nung par medemer anajibo yiruyibong kecha masü. Ajisüaka parnok amenba auto rickshaw anishir Mitlesh Sahu, (31) tapubang achijlen injang agi yirutsü.
Temelaba melii injang khadoksangji 13 NAP(IR) nungi Hav. Samzai Zeliang lir aser idangjisa pa apu aser aser pa ket nungi service prangpong meyipa meshi.
Iba tatalokba dak sendakba atema Sub Urban PS nung ken o ka benokogo.
SBN Police Station, Dimapur ajanga 13 NAP (IR) telokji patrolling duty lemzüktsü. Parnok Rail bazaar leni aodang section commander jagi Autorickshaw (unregistered) ka parnok tsütsü aruya aliba anendaktsü. Autorickshaw ji ano junga manen lia commander jagi pa indang service weapon nungi injang ka khadok, ta Deobarnü Addl DCP/ PRO, Dimapur police-i sangdong ka nung metetdaktsü.
Dimapur Police-i iba tatalokba atema kanga sasa bilemer aser aibelener nem tapet temerenshi agütsütsü. Ajisüaka, iba tatalokba ya standard operating procedure anema inyakba mapa lir ta jangjashitsür aser iba ama mapa inyaktsü asoshi tetuyuba kecha maliasü. Police Department mesüra Dimapur Police-i ibala inyakyim magizüker aser iba inyakyim ya ozüng anema inyakba ta züngshitsü, ta Addl DCP/ PRO, Dimapur police-isa metetdaktsü.
Ano, Dimapur Bengali Samaj(DBS)-ia tanga sangdong ka ajanga August 22 aonung IRB jawan kati Dipanker Dey khasetba kukua aitsür, ta metetdaktsüogo.
Tai maketer ka kuli kecha melii khasetba kukua aitsür aser tasür kibong den asüku lemsateper, ta DBS tir, K K Paul-i sangdong nung shia lir.