Dimapur nung ‘KCC renewal-cum-recovery camp’ amung

Dimapur, March 25 (TYO) : Honibarnü SBI Regional Office, Super Market Complex nung State Bank of India (SBI)-i ‘KCC renewal-cum-recovery camp’ sentong tulu ka ayonga mungogo.
Iba camp nung SBI ketdangsertemi KCC (kissan credit card) amshirtem dang KCC loan, renewal aser recovery indang rateta ashi. KCC account alirtemia parnoki loan nung tebilemtsü adokba aser parnoki ajangshibatem lemsatepa liasü.
SBI Regional office Dimapur nung Assistant general manager Thangboi Lunkim-i, Nagaland state nung KCC loan agirtem ket nungi sen kanga ajema meyipa anguba ajanga iba KCC renewal -cum-recovery camp ya regional office nung ayonga akar, ta osangbenertem dang ashi.
Lunkim-i, India sorkari KCC ya 2000 küm sensakertem aser alu tila ayimertemi tsünüsempongtsü talila tsünüba nung yaritsü asoshi lapoktsüba lir. KCC loan (Sen lakh 1 tekübok) ya küm pungu nung aomatsü asoshi aputsür koba küm shia renew asütsü, ta ashi.
“Nagaland nunga aluyimer nisung meyirjang aikati KCC loan agia lir aser iba sentsüh ano maoma. Tang tashi nung Nagaland nungi KCC loan shilem 20 tashi anga aoma lir.
Iba sentsüh Medziphema tesem nungi tajungba aodar saka Peren, Phek, Dimapur aser Kiphire district tem nungi kanga ajema arur,” ta SBI ketdangser kati metetdaktsü.
SBI ketdangser jagi, Nagaland nung aluyimertem ajaki amai KCC loan agir jiro, alo, gobi aser beans lutem ayimba den ak-a metsür, ta shisem.
Loan meyipa magütsür yimtem ‘blacklist’-i yoktsü asoshi joko mapang talangka bilemdangdar, ta paisa ashi.