Dimapur nung Kentet 1138 kaket ka sayaogo

Honibar nikongdang Dimapur nung Tir Yimyim adokdak “Kentet-Kechisarinai Taküm Dak Tuiter,” ta asüba kaket sayatsüba mapang agiba noksa ka yangi angur. Noksa nung alirtemji abelen nungi : Samaro kentener Wb.Wati Jamir, Tir Yimyim Yimozülur K.Temjen Jamir, Kaket zülur Wb.Talitemjen Imchen aser Heritage Publication nung Yimozülur Dr.Asangba Tzüdir.

Dimapur, August 29 (TYO) : Ao kin asoshi osang tajung kaji tan ya Ao oshi nung züluba kakettem sayaba mapang amato ka kümdagi aser Honibar nikongdanga kaket ka tenüng agi “Kentet, Kechisarinai Taküm Dak Tuiter” ta ser kaket ka Tir Yimyim yimozülur Wb.K.Temjen Jamiri sayatsüogo.
Iba kaket ya Mangmetong nunger Wb.Talitemjen Imcheni züluba kaket lir. ‘Kentet’ tetezü agitetba aser iba kaket nung tsüraburtem mapang nungi jembia aruba kentettem (Quotations) den tanü asüng jembibatem dena kentet ajak agi 1138 tashi lir.
Nisungtem libalirua arudang tatalokba jenti ajurur aser item tatalokba aser tajangshibatem nung asenok asoshi tansütsü aser tatishitsü aika lir, anungji itemji bilemteta asen taküm len anidaktsütsü asoshi item kentettem ya kaket züluri kanga meranga bendena züua lir.
Iba kaket züluri ashiba agi, iba kaket nung aliba kentet teimbaka lanuwa mapang nungi tebu nungi angazüka aru aser temesüng nisungtemi jembiba kentettem dang nungibo asenoki jembiba kentettemsa tajungba aser tetezü taketba lir.
Iba kaket zülur nem tenüngsang agüja jembidang, Tir Yimyim Yimozüluri tsürabur mapang asenok reshikangshi timtem ajuruba aser jangratema aliba mapang aser tatalokbatem ajak nung tansütsü aser tatishitsü aika keta lir, anungji itemji mamadoki kenteta amshitsüla aser asen taküm nem jembidaktsütsüla, iba jagi asen taküm aser nübortem madak Tsüngrem temeim aser taochi tali jangjaa bilemtettsü ta metetdaktsü.
Tanü Ao oshi nung adokba kakettem asenok talidak tonga moi ki tonga bener arutsübaji maongka ulura, anungji ajaki alia azüngtsüla, ajisüaka mazüngtsü atemabo malitsüla ta kaket zülur Wb.Talitemjen Imcheni iba kaket zülur den sensaksemdang metetdaktsü.
Iba kaket Mokokchung nung Eastern Book Depot, Students Book Center, Kohima nung Western Book Depot aser Dimapur nung Signet Books, OM Books Store aser Christian Literature Centre nungi angutsü.