Dimapur nung Legal awareness sentong ka kaogo

Dimapur, July 30 (TYO): Nüburtem tang tensa nung meteta aliyim nung tali tashi aittsü nükjidong nung Nagaland Las Students’ Federation (NLSF)-i Brehostibar nü meteta aliyim sentong ka ayonga Hotel Saramati, Dimapur nung mongogo.

Nagaland Voluntary Consumers organization (NVCO) Tir aser  ACAUT (legal Cell) Convener, Kezhokhoto Savi-i, chirapera-a aliba nübur kati lokti asoshi tajangzük jenti bentsür aruba nung yarir. Yamaji kümdanga aliba ajanga, tang asen tendak ochimashi inyakyimtem ajak ajema kümdaktsüba nung yaritsü. Ajisüaka iba amala meteta aliyim sentong ya yimtak yimtsüng aika nung anünga lir, ta ashi.

State ketdangsertem dang nüburtem temeten wazüka ayutsü asoshi temepishiba agüja nüburtem dang tang nungi tenzüka tali chirapera alitsü ayongzükba mapang pai, nüburtem temeten kümzüka aser wazüka ayubaji asenok ajak tebilemtsü lir saka talisa sorkar teinyaktsü tuluba lir, ta ashi.

Nagaland nung Right to Information (RTI) agi kechi temelenshi agütsür ibaji lemsatepba mapang, ACAUT (RTI Cell) Convener, Dr. Khekugha Muru-i ashiba agi, Right to Information (RIT) ya ajanga ochimashi aser tim masüba benshiba metetdaktsüba nung yarir aser ibaji ajanga nübur ajaki inyakyim ajak meteter.

RTI file asüdang koba atema file asür ibaji kanga jangja asü nungdang taginüba metetpelatettsü. RTI file masüdang mezüng osang tejangja agimatsüla, ta paisa shisem.

Joko asen lokti ya tajung kodanga meyiba marutsü amai raksatetogo aser iba ama tensa nung tajemzük nüburtem tokrongba lir, ta pai ashi.

Teraksa aser ochimashi mapa ajema akümtsü aser nüburtem yaritsü asoshi pai ozüng metetertem dang asen lokti nung teraksa anema raratsü mepishia ayongzük.

Khehishe Sumi-i asihba agi, kidang teyariteper ayutsü ya joko asen Naga nunger yimya ka amai kümogo, ajisüaka parnokiji arishi küm agi matong ser nung asen kidang yura ibajia nüburtem temeden anema lir.

‘Universal Declaration of Human Rights’ atema UN-i “all human beings are born free with equal dignity & rights” nung ajemdaker Khehishe-isa ashiba agi, nisung kati mezüng tangar ka temeden akümtsübutsü metettsüla iba sülen jiang tangar asoshi jembiang.

State nung nüburtem temeden anema inyakba mapang aika nung ajurur aser ibaji ajanga tai maketba nüburtem okronger. Nüburtem temeden tashi ita alitsü atema state nüburtem temeden commission ka alitsü, ta pai shisem.

Oaüng azüngertemia Lok Ayukta, matamabensar aser Swachh Bharat atema tebilemba kar lemsatepa liasü.