Dimapur nung local product daily market ka semzükogo

Dimapur, Rongjui/Sept. 04 (TYO): Farmer Producer’s Organization (FPO), Dimapur District ajanga ketdangsüa Local Product Daily Market ka Nagarjan traffic point anasa Super Market nung Principal Secretary, Horticulture, M. K. Mero-i Rongjui/September 04, 2018 nü semzüktsüogo.
Iba sentong nung adenertem den jembiba mapang, iba market ya aloyimer aser nüburtem asoshi kanga tongtibang lir, anungji telok anaprong asoshi iba ama tesem ngutetba ya kangadang tia taka, ta Principal Secretary-i ashi.
DAN ajanga ali agütsütsü mulunga lir asünung, iba market nung cold storage ka department-i yanglutsütsü, ta Mero-isa ashi. Iba market kümzüka aser müreka ayutsü mechi tim lenmang nung ozüng yanglua amshitsü nüngdaker, ta paisa shisem.
Kasa sentong nung mapang tatsüka agia jembiba mapang, aloyimertemi züsentetba bener arua ayoktsü asoshi tesem agütsüba atema Director, Horticulture, Dr. R. Elithung Lotha-i Development Authority of Nagaland (DAN) dang pelaba metetdaktsü aser nüburtem dang organic chiyongtsü aser osettem iba tesem nung arua alitsü ajungshi. Department nungia akokba lenmangtem nung yaritsü, ta paisa shisem.
Iba anogo aloyimertemi züsentetba bener arur tajungtiba asem nem senpet agütsü. Iba senpet ya Bharatiya Farmers Agro Business Development Cooperative Ltd ajanga sponsor asü. Iba market semzüktsüba sentong ya FPO züngsem, Nzamo Humtsoe-i ketdangsüa agi.