Dimapur nung Lokayukta awareness program ka agi

Dimapur, April 15, 2019: Tanü Dimapur Deputy Commissioner indang Conference hall nung Lokayukta awareness program agidang tangokba noksa nung angur.

Dimapur, Rongchii/April 15 (TYO): April 15, 2019 nü Dimapur Deputy Commissioner indang Conference hall nung Lokayukta awareness program ka ayongzüka agiogo, ta tanü ketdangsertem osang ka ajanga metetdaktsü.
Nagaland Lokayukta, Justice Uma Nath Singh-i Lokayukta Act indang metetdaktsü aser Lokayukta kübok ken o agütsüba inyakyim metetdaktsü.
Paisa, telatetba kar aser ozüng kar nung ajemdaker Lokayukta kübok ken otem agizüktsü, ta metetdaktsü.
Justice Uma Nath Singh-i züngsem ajak dang ochimashi anema raratsü asoshi mera tapet agia inyaktsü ajungshi.
Kasa sentong nung okila jembidang IGP aser Director, Lokayukta, Police, I. Meyi Onen-i, Nagaland Lokayukta Act 2017 nung kanga tongtibang kaji- Lokayukta ken otem nung joko state sorkari prosecution sanction magütsütettsü, ta ashi.
“Lokayukta Act benokba ajanga taoba mapang Vigilance-i tebushidak aliba ken o ajak Lokayukta nem transfer sütsüogo. Lokayukta Act kübok Arrla 26 ajanga prosecution sanction atema Lokayukta nem tashi agütsür,” ta paisa shisem.
Ochimashi aser tim mesüi ketdangsüba na ajanga ketdangsübaren nung kongshir, ta shia Meyi Onen-i, sensotem takoksa ngudaktsüba ken otem tekaraba nung repranga telemtetba agitsü asoshi Lokayukta ya ochimashi nokdangba hadir ka asütsü, ta ashi.
UPA Lokayukta, Mayanglima-i, ochimashi ajema akümtsü aser Lokayukta junga benoka inyaktsü atema nüburtemi shilem agitsüla, ta ashi.
Iba sentong ya Dimapur DC leniba nung agi aser sentong nung Department balala nungi tekolakpurtem, administrative officers, melungtet teloktem, law students aser tangartem aden.