
Dimapur, February 15 (TYO) : Hombarnü Health & Family Welfare (H&FW)-i District Hospital Dimapur nung Long Lasting Insecticidal Nets (LLIN) lema agütsü.
Iba sentong ya National Vector Borne Disease Control Programme (NVBDCP) kübok ayongzüka agi aser tongti tesemdangerji Commissioner & Secretary, Health & Family Welfare, M. Patton liasü.
Nagaland nung tenemlen aliba tesemtem nungbo malaria khuret kangabo mali saka tenemtsünglen iba tashidak bulua adoker. Merla ajanga dengue, elephantiasis, zika amala tashidak balala belenshir aser iba ya loktiliba indang khuret ka kümogo. Iba khuret ya medical dak sendakba khuret dang masü saka social economy nunga tetsükdaktsü bener arutsür, ta M. Patton-i ashi.
Malaria tashidak noktangtsü atema bangdak department tem, village council, telok balala aser public-i shilem agitsüla, ta paisa ayongzük.
Patton-isa ashiba agi, global agency kati teyari agütsüba LLINs lakh 9 shi public nem angati lema agütsütsü aser itemji malaria kanga bulua adokba tesemtem nung lema agütsütsü.
Sentong nung Joint Director & State Program Officer, NVBDCP, Nagaland, Dr. Kevichusa Medikhru-i o jembidang ashiba agi, Nagaland nung malaria adokba kanga ajema kümogo, ajisüaka malaria timba adokba tesemji Dimapur lir.
Iba sentong ya malaria vector ajemdaktsütsü atema lir aser tashidak kanga bulua adokba tesem ajak nung LLINs alemtsü aser talisa mashisa aliba tetsürtem aser tanur dak rangloker alemtsü, ta Dr. Kevichusa-isa ashi.
Tanü agiba sentong nung Commissioner & Secretary, FHW, Patton aser tongti ketdangsertemi LLIN lema agütsü aser Dr. M. A. Wati, Chief Medical Officer, Dimapur-i anküp tepela o jembi.
You must be logged in to post a comment Login