Dimapur nung mokdang tiptema agiogo

Dimapur nung City Tower tesem azüngmeyaka aliba angur.

Dimapur, Tsüklai (Feb) 01 (TYO): Tanü Core Committee of Nagaland Tribal Hohos and Civil Organisations (CCNTHCO)-i ayongzüka ghonda 12 mokdangba anogo nung Dimapur yimti nung mepetmesü mesüra lendong atalokba osang kecha maliasü.
Yimti nung shishilembaba tesem ajunga shibangba den banks, shisaliok rejutem aser sorkar office tem shibangba ajanga nüburtem libaliro kongshia liasü. Iba den külemi yimti lenmangtem nung gari aser nisungtema mesenzü.
Tanü tongtibang tesem aika nung security sepaitem nem mapa lemzüktsü, saka jila tesem kecha nunga mokdang ayongzüker volunteers maliasü.
Ano Chumukedima nungbo mokdang ayongzükaka nüburtem kangabo mekongshi, kechiyong Angami Public Organisation-i, parnoki parnok litsü nung mokdang mayongzüktsü, ta jelia sangdonger liasü.
Assembly election magidang Naga yimtenren onük tama latettsüla, ta takhangba agütsüba magizüki Tsüklai 27 nü Assembly election agitsü sangdongba anema iba mokdanga ayongzüka liasü.