Dimapur nung MP road tereprangtsü tajungba kümogo

Dimapur, September 26 (TYO) : Honibarnü Dimapur-I MLA aser Ex-Officio DMC, H Tovihoto Ayemi-i MP road, Dimapur nung Dimapur Municipal Council (DMC)-i yangluba lenmang aser beautification project lapoktsü.
Dimapur nung gari lenmang mazüngtibaji MP road lir aser iba tesem nung DMC-i steel railing/beautification board tejang 155 yangluba den kilenzü aodak sadema yanglushiba ajanga tang kanga junga kümogo.
Mapang melenshiba ama temelenshi aika nguogo aser DAN sorkari nübortem ajangzükdaktsütsü atema terenlok mapa tasen aika inyaker, ta tanü Ayemi-i ashi.
Sorkari inyakba mapa ajakji nübortem asoshi lir anungji tebilemtsü khuret abenba senso tajung ka ama nisung ajaki public property ajak aangtsüla aser anepalutsü tim, ta paisa ayongzük.
DMC-i Dimapur renlokdaktsütsü atema mapa acha-ayanga aser bendanga agüja inyakba atema Ayemi-isa parnok nem tenüngsang agütsü.
Dokan kibur aikati gari lenmang anasa dang jana endoker anungji tang nungi DMC-i yanglua aliba jana endokba tesemtem nung dang jana endoktsüla, ta tanü DMC CEO, H Atokhe Aye-ia metetdaktsü.
DMC-i public yaritsü atema mapa tajungtiba agi inyaker anungji public-ia Dimapur jila merükmejua ayutsü atema tangatetba alitsü ayongzüker, ta paisa ashi.
Tang Dimapur kübok tesem balala nung terenlok mapa inyakba ya toll tax saruba nungi aruba sen ajanga lir aser iba asoshi state sorkar aser Municipal Affairs Cell dang kanga pelar, ta DMC CEO, H Atokhe Aye-isa metetdaktsü.