Dimapur nung Nagaland Tobacco Control Programme senden amen

Metsüremi (March) 27, 2018 nü Dimapur DC indang Conference Hall nung NTCP Coordination Committee review senden amendang agiba noksa ka angur.

Dimapur, Metsüremi (March) 27 (TYO): Nagaland Tobacco Control Programme Coordination Committee-i Dimapur district atema 4th quarter 2017-18 senden amen.
Sendenji Metsüremi (March) 27, 2018 nü Dimapur Deputy Commissioner indang Conference Hall nung amen.
Senden nung mendenji ADC Dimapur, Sara Jamir liasü aser lai ketdangsertem aser school o college balala nungi teshimtet nübotem pelashishia agizük.
Senden nung ADC Sara Jamir, DPRO Dimapur Lolano Patton, Deputy CMO Dr. Antoly aser Liaison Officer, DMC G. Sharma nungertemi school 3 aser collge ka nem Tobacco Free Certificate tem lema agütsü.
Kulikaket angurtem- G. Mhinsiu School Burma Camp, St. Thomas Higher Secondary School, Naga Gaon, St. Francis De Sale School, Phiphema aser Yemhi Memorial College, Nepali Basti.
Dr. C. Tetseo (DNO, NTCP)-i Power Point presentation ajanga Global Adult Tobacco Survey, 2016-17 metetdaktsü.
Tobacco Free Campaign ya tanen makai inyaktsüba mapa ka lir aser school o college temi pei rejutem Tobacco Free Zone kümdaktsütsü atema inyakang ta Dr. C. Tetseo-i ayongzük.
St. John High school, Diphupar Principal, Johnny Abraham-i ajangshia aruba indang ashidang,
Sempettem anguba ama school/college temi teinyaktsü khuret tuluba agizüker. Tanurtem dang moko achiba ajanga temang nung timtem adokba osang talila prokshitsü aser metetdaktsütsü atema tsüraburtem, tesayurtem aser village council nungi züngsemtem dena ludentem tentet nung ajungtsü, ta Abraham-i tebilemba ka lemsatep.
Kaketshirtemi ghonda 6 shi dang school nung mapang endoker anungji asenoki iba mapa ya kidang nungi tenzüktsüla asder Tobacco Free Child, Tobacco Free Family aser Tobacco Free Family asangsang nung ataloktsüsa mapa inyaktsüla, ta paisa shisem.
Senden nung menden Sara Jamir-i tobacco free school ajak nem tenüngsang agütsü aser maneni iba mapa tuluba nung inyaktsü atema ayongzük.
“School-i tanurtem asoshi moko maliba temeket ka kümdaktsüra tarutsü nung kobi melii moko maliba aso ka adoktsü. Dimapur district ya tobacco free kümdaktsüra, tanga district temia iba sülen anidaktsü” ta Sara-isa ayongzük.